EH Bildu oso kezkatuta dago pertsona errefuxiatuen drama humanitarioaren aurrean Europako Batasuneko agintariak eta zenbait sektore politiko eta sozial hartzen ari diren jarrerarekin eta erabakiekin. «Erabaki anker horien adibide argiena da Europako Batasunak Turkiarekin lotutako akordioa, errefuxiatuei muga guztiak ixteko helburua daukana». EH Bilduren ustez, akordioa lotsagarria da, bidegabea eta giza eskubideen nazioarteko hitzarmen guztien aurkakoa. Europako Batasunaren sorrerako helburu eta baloreen aurkakoa da, gerretatik eta pobreziatik ihesi doazen pertsonak etorkizun gabe uzten dituelako.
Era honetako akordio eta erabaki antidemokratikoekin pertsona errefuxiatuen joan-etorria geldituko zela uste zuten Europako agintariek, baina errealitatea bakoitza bere lekuan jartzen ari da: bide batetik ez bada bestetik, errefuxiatuak Europan sartzeko ahaleginetan jarraitzen dute. Eta bide arriskutsuagoetatik. Ikusi besterik ez dago azken egunotan Mediterraneo itsasoan izan diren hildako guztiak. Europa eta Turkiaren arteko akordioak norbaiti mesede egiten badio pertsona errefuxiatuekin aritzen diren mafiei da. Hori da Europak lortu duena. Hori eta mendebaldeko gizarteari errefuxiatuen auzia ezkutatu nahi izatea.
Horregatik guztiarengatik, bestelako oinarrietan eraikitako Europa batean sinesten dutenei eta errefuxiatuen dramari giza eskubideetan oinarritutako konponbidea berehala amaiera eman behar zaiola uste duten euskal herritar guztiei ostegunean herri eta hirietan egingo diren elkarretaratzeetan parte hartzeko deia egiten die EH Bilduk.