Finalerdi bikainak
Otsailaren 20an, larunbatean jokatu ziren finalerdiak Iruritako Aranabia pilotalekuan. Lehenbizikoan, Irurita C (Iñaki Etxandi, Guillermo Etxenike eta Mitxel Etxenike) eta Irurita D (Oskar Urrutia, Egoitz Prim eta Jagoba Ramos) aritu ziren eta txapelketako partidarik onena eskaini zuten. Irurita Ck 9-8 irabazi zion Irurita Dri. Partida berdindua joan zen, baina gehienean Irurita D aitzinetik ibili zen markagailuan (0-1, 1-1, 1-3, 3-3, 3-5, 5-5, 5-7, 7-7, 7-8 eta 9-8). Hortaz, azken jokoan bakarrik aitzineratu ziren Irurita Ckoak. Taktika, teknika eta fisiko aldetik partida bikaina izan zen.
Bigarren finalerdia ere ederra izan zen. Irurita B (Gorka Urtasun, Karlos Goikoetxea eta Jon Sansiñena) eta Irurita F (Joseba Urtasun, Patxi Barberena eta Miguel Angel Iñarrea) izanen ziren aurrez aurre eta azkenean Irurita B 9-5 nagusitu zitzaion Irurita Fri. Urtasun anaiak izan ziren aurrez aurre eta bosnako berdinketara arte berdindua joan zen partida, nahiz eta gerora galtzaile izan zirenak ibili aitzinetik. (0-1, 1-1, 1-3, 2-3, 2-5). Baina bosgarren joko horretan gelditu ziren Irurita Fkoak, beharbada fisiko aldetik nekatuagoak. Zazpi joko erreldoan egin zituen Irurita Bk eta honenbertzez 9-5 irabazi eta finalerako sailkatu zen.
Beraz, Irurita Ck eta Irurita B jokatuko dute finala otsailaren 27an, 18:00etan Aranabian. Ordubete lehenago hirugarren postua lortzeko lehia jokatuko dute Irurita Dk eta Irurita Fk.