Munduko txapeldunaz gain, Italiako Paolo Vicenzik, Suitzako Chirstophe Geissler-ek, Frantziako Pierre Puybaret-ek eta Espainiako Jon Rodriguez segoviarrak osatuko dute nazioarteko partaidetza.
Hegoaldeko lau herrialdetako txapeldunak ere (Iker Vicente Nafarroan, Aitzol Atutxa II Bizkaian, Arkaitz Jauregi Araban eta Iñaki Azurmendi Gipuzkoan) lehian izanen dira eta Arantzako Donato Larretxea ere gonbidatu dute. Hauez gain, jokatutako kanporaketetan finalean izateko eskubidea lortu dute Sunbillako Felix Etxeberriak, Leitzako Jon Rekondo eta Ruben Saralegik eta Joseba Otaegi, Eneko Otaño eta Luis Txapartegi gipuzkoarrek.
Kanporaketa bidez erabakiko da lehia, final zortzirenetatik zortzi aizolari pasatuko dira final laurdenetara eta hortik, lau onenek jokatuko dute finala. Kanporaketa bakoitzean, 54 ontzako bina enbor moztu beharko dute ahal bezain abudo.