Munduko Aizkolari Azkarrena txapelketaren lehen kanporaketa igandean jokatuko da Agurainen

Ttipi-Ttapa 2016ko urtarrilaren 29a

Finalean izanen den Lawrence O'Toole, Munduko txapeldunak erakustaldia eskainiko du igandean.

Asier Pellejero aresoarra, Eneko eta Ruben Saralegi leitzarrak, Felix Etxeberria sunbildarra eta Mieltxo Mindegia zubietarra izanen dira eskualdeko ordezkariak

16 aizkolarik parte hartuko dute igande eguerdian Agurainen jokatuko den Aizkolari Azkarrena Munduko Aizkolari Txapelketaren lehen kanporaketa jardunaldian. Bigarren kanporaketa otsailaren 6-7ko asteburuan jokatuko dute Gipuzkoa eta Bizkaiako aizkolariek. Kanporaketa bakoitzeko bina aizkolari onenek jokatuko dute finala otsailaren 21ean, Munduko txapeldun den Lawrence O’Toole australiarrarekin eta Euskadi, Araba, Bizkaia, Gipuzkoa, Nafarroa, Txekia eta Italiako txapeldunekin batera. Beharbada Suitza eta Frantziako txapeldunak ere finalean izanen dira.

Igande eguerdian Aguraingo kanporaketan ariko diren 16 aizkolarietatik bortz eskualdekoak dira: Asier Pellejero aresoarra, Leitzako Eneko Saralegi eta Ruben Saralegi, Sunbillako Felix Etxeberria eta Zubietako Mieltxo Mindegia. Iban Resanok, Daniel Vicentek, Aitor Senosiainek, Julen Kañamaresek eta Juan Jose Lopezek osatuko dute Nafarroako ordezkaritza. Beraiekin batera, Arabako Aitor Jauregi, Iñaki Kintana eta Eloi Kortxero; Asturiasko Dani Lopez eta Esteban Muñiz eta Segoviako Juan Rodriguez ariko dira.

Kanporaketa sistemaren bidez ariko dira, 45 ontzako enborrari bina korte eginez. Gainera, Agurainera hurbiltzen direnek, Lawrence O’Toole Munduko txapeldunak australiar erara eginen duen erakustaldia ikusteko aukera izanen dute.

Kirola

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.

Egin TTIPI-TTAPAren lagun