Dagoeneko martxan da Solaslaguna egitasmoa. Parte hartu nahi izanez gero edo bertzerik gabe gehiago informatu, aurkezpen hitzaldira eta ondoren eginen den luntxera joatea bertzerik ez dago, ekitaldi irekia baita.
Baztango, Bortzirietako eta Malerrekako Solaslaguna 2007an sortu zen. Solaslaguna egitasmoan euskarazko mintzamena hobetu nahi duten hiztunak, txukun solastatzen dutenekin elkartzen dira talde txikietan (normalean launaka edo bosnaka), astean behin eta ordu betez.Gaurgero, 90 hurbil gara eskualdean.
Solaslagunaren gisako egitasmoetan parte hartzen dutenek euskara maila hobetzeaz gain, maizagotan erabiltzen dute eta ongi pasatzen dute, saioetan arras gustora egoten direla aitortzen dute.
Beraz, euskara ikasten ari dirennei lagundu edo norbere ahozko euskara maila hobetu nahi dutenentzat topalekua da Solaslaguna. Informazio gehiago 610 920673 telefonoan edo http://solaslaguna.blogspot.com