Piktogramak gauzak eta ekintzak modu xinplean adierazten duten marrazkiak eta edozein hizkuntzarako baliagarriak dira, ez baitituzte hitzak adierazten, errealitateak baizik. Piktograma hauekin, autismoa duten pertsonek eguneroko ekintzak errazago ulertzen dituzte.
Urriaren 29an, Denok Bat Federazioko kideek jaso dituzte 224 piktogramak ANA elkarteko Amaya Ariz presidentearen eskutik, eta gisa honetara bat egin dute duela bi urte elkarte honek martxan jarri zuen Uler ezazu zure herria piktogramen bidez kanpainarekin. Gaurgero 5.000 toki seinalizatu dituzte Nafarroa osoan, autismoa dutenei erraztasunak emateaz gain, gaur egungo 68 jaioberrietatik bati eragiten dion sindrome honi buruz sentsibilizatuz eta ezagutzera emanez.
Denok Bat elkartearen izenean, Deñe Abuin presidentea, Helena Santesteban presidente ordea, Isabel Gonzalez diruzaina eta Lourdes Andueza bokala izan dira ekitaldian, ANAko Amaya Ariz eta Paula Rodriguezekin batera.
Aitatxia eta familia Berakoak dituen Amaya Ariz ANAko presidenteak eskertu du Denok Bat elkarteak emandako harrera ona eta aipatu zuenez, “4 eta 8 urte arteko umeen begien parean jarri behar dira piktogramak, eta behin paratutakoan, elkarteak eta familiek leku horietara joaten dira, haurren hiztegia eta ulermena aberasteko”.