Sei bikote lehiatuko dira binakako erremonte txapelketa nagusian

Ttipi-Ttapa 2015eko urriaren 28a

Txapelketa jokatuko duten erremontelarietako batzuk izan ziren urriaren 27ko aurkezpenean.

Hamabi erremontelarietatik sei eskualdekoak izanen dira: Koteto Ezkurra, Endika Urrutia, Xanti Uterga, Patxi Olazar, Josetxo Ezkurra eta Joxe Etxeberria

Sei bikote ariko dira binakako 45. erremonte txapelketa nagusian, joan den urtean Koteto Ezkurra doneztebarrak eta Ionek jantzi zuten txapelaren bila: Urriza eta Agirrezabala, Xanti Uterga eta Patxi Olazar doneztebarrak, Koteto Ezkurra doneztebarra eta Endika Urrutia saldiastarra, Etxeberria IV eta Joxe Etxeberria III doneztebarra, Josetxo Ezkurra II doneztebarra eta Barrenetxea IV eta Matxin III eta eta Ion. Beraz, hamabi erremontelarietatik sei eskualdekoak izanen dira.

Urriaren 31n hasi eta azaroaren 28an akituko den ligaxka denek denen kontra jokatuko dute eta lau lehenbizikoek lortuko dute finalerdietarako txartela. Finalerdiak abenduaren 5ean eta 12an jokatuko dituzte eta final nagusia abenduaren 19an. Txapeldunei eta finaleko erremontelari onenari eman ohi zaien txapel eta sariez gain, lehen aldiz, txapelketako aurrelari onenari eta txapelketako atzelari onenari ere saria emanen zaie.

Bikote guztietan bada noizbait bainakako txapeldun izandako erremontelariren bat: Ezkurra (1994, 1999, 2006 eta 2014an); Ion (2011, 2013 eta 2014an); Etxeberria III (2010ean); Barrenetxea IV (2012an); Urriza (2007, 2008, 2010 eta 2012an) eta Uterga (2013an).

Koteto Ezkurra izan zen urriaren 27an Galarretan egindako aurkezpen ekitaldiko protagonista nagusia, joan den urtean txapeldun izateaz gain, duela bi aste min hartu baitzuen partida batean. «Ez zen haustura izan eta oraindik kantxara bueltatu ez banaiz ere, txapelketarako prest egonen naiz», aipatu zuen.

Kirola

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.

Egin TTIPI-TTAPAren lagun