Bederatzi aizkolarietatik bortz eskualdekoak izanen dira: Jon Rekondo (Leitza), Oihan Larretxea (Bera), Ruben Saralegi (Leitza), Donato Larretxea (Arantza) eta Mieltxo Mindegia (Zubieta). Horiekin batera, faborito nagusia izanen den Etxarri Aranazko Floren Nazabal, Lezaungo Juan Jose Lopez, Arostegiko Julen Kañamares eta Otsagiko Iker Vicente ariko dira. Bortz enbor moztu beharko dituzte: Bi kanaerdiko, bi 60 ontzako eta oinbiko bat.
Bortz lehenbizikoek urriaren 4an, 13:00etan Etxarri Aranatzen jokatuko den finalerako txartela lortuko dute. Bi azkenek, aldiz, maila galduko dute
Nafarroako bigarren mailako arpana txapelketa
Aizkora kanporaketaz gain, Nafarroako bigarren mailako arpana txapelketa ere jokatuko da igandean Uharteko jaialdian.
Lau bikotek hartuko dute parte: Josu Zuñiga (Txantrea) eta Lander Landiribar (Amaiur); Raul Maiza eta Jose Luis Cano (Berriozar); Andoni Irigoien (Aniz) eta Guillermo Etxenike (Irurita) eta Ekaitz Maritorena (Berroeta) eta Eneko Irigoien (Aniz). Beraz, zortzi kirolarietatik bortz baztandarrak izanen dira.
Bikote bakoitzak etzanda jarritako 45 ontzako enborrean 10 epai eta zutik jarritako 45 ontzako enborrean lau epai egin beharko ditu. Txapeldunak mailaz igoko dira.