Larunbatean abiatuko da erremonteko buruz buruko txapelketa

Ttipi-Ttapa 2015eko abuztuaren 6a

Buruz buruko txapelketan parte hartuko duten erremontelariak, Ion izan ezik.

Xanti Uterga doneztebarra eta Endika Urrutia saldiastarra izanen dira eskualdeko ordezkari bakarrak

Buruz Buruko erremonte txapelketaren 33. edizioa larunbat onetan abiatuko da, Ion eta Matxin III.aren arteko partidarekin. Irabazleak Endika Urrutia saldiastarraren kontra jokatuko du abuztuaren 11n eta partida honen irabazleak finalerdietako ligaxkan lekua izanen du, Xanti Uterga doneztebarra eta Urrizarekin batera. Bertze adarrean, Etxeberria IV eta Barrenetxea IV.aren arteko partidako irabazlea sartuko da finalerdietan.

Finalerdietako ligaxka abuztuaren 18an hasiko da eta lau erremontelariak elkarren kontra ariko dira. Bi lehenbizikoek jokatuko dute finala irailaren 12an.

Hameka aldiz txapeldun izan den Koteto Ezkurra ez da ariko eta iaz txapeldun izan zen Julen San Miguel enpresatik kanpo dagoenez, Xanti Uterga eta Endika Urrutia izanen dira eskualdeko ordezkari bakarrak. Urrizak bakarrik daki buruz buruko txapeldun izatea zer den, 2012an eta 2013an irabazi baitzuen. Bera da faborito, baina lesio batetik atera berria denez, inoiz baino irekiagoa dago txapelketa.

Kirola

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.

Egin TTIPI-TTAPAren lagun