Euskaraz Blai 2015 Udalekuak kanpainaren aurkezpena egin zuten apirilaren 9an Baztan-Bidasoa Turismoa/Hiruak-Bat elkartearen egoitzan (Bertiz Landa Turismo Zentroan). Proiektuak 15. edizioa beteko du eta azkeneko 4 urteetan, Nafarroako Gobernuaren laguntzarik gabe, Arantzako Aterpek eta Beintzako Orbela aterpetxeek antolatzen dute bere aldetik.
Mikel Albisuk, Baztan-Bidasoa Turismoa Elkargoaren izenean, bere bazkideen proiektuak ezagutzera emateko konpromisoa azaldu zuen, egitasmo hauek Baztan-Bidasoa Euskal Herriko gazte eta familien artean ezagutarazten laguntzen dutelako, eta turismorako bultzada handia suposatzen dutelako. «Lehen Bertiz Partzuergotik egiten zen moduan, orain Baztan-Bidasoa Turismotik eginen dugu», azaldu zuen Baztan-Bidasoa Turismo Elkargoko lehendakariak.
Xabier Zugarramurdik, Arantzako Aterpeko arduradunak, proiektuaren ezaugarri nagusiak azaldu ditu: udan zehar, astebeteko 10 txanda eskaintzen dira, denetara 800 plaza, bi aterpetxeetan banaturik. Helburu nagusia gaztetxoen artean euskararen erabilpena bultzatzea da, «gazte askok euskara eskolarekin identifikatzen dutelako, ez egunerokoan komunikatzeko hizkuntza». Horretarako jolasak, kobazuloko bisita, bainu freskagarria bezelako natur jarduerak… aisialdirako egitarau osatua prestatu dute, igandetik larunbatera garatzen dena. «Nekazaritza bizimoduari ere garrantzia eman diogu, egun batean baserri batean bisita egin eta gero haurrek bere otordua prestatzen dute».
Izaskun Altzuri sunbildarrak, udalekuetako zuzendariak, aurtengo berrikuntza azpimarratu du: txandak egiterakoan hezkuntza eredua ez da irizpide nagusia izanen (A, B edo D), gazteak euskararekin duen harremana baizik. Hala, ez da A eredu hutsezko txandarik antolatuko. Bertze berrikuntza matrikulazioa internetez egiteko aukera da, www.euskarazblaiudalekuak.com web guneraren bidez. Bertan informazio osatua aurkituko da.
Matrikulatzeko epea zabalik dago maiatzaren 8a bitartean. Informazio gehiago (09:30etik 13:30era): 622 728 984 telefonoa.