1960tik honat TTIPI-TTAPAren eremuko bederatzi herrik egin dute goiti bizilagun kopuruan: Bera, Doneztebe, Elgorriaga, Igantzi, Ituren, Leitza, Lesaka, Sara eta Senperek. Horiez gain, beheranzko joera utzita, 2000. urteaz geroztik Baztan, Donamaria, Eratsun, Etxalar eta Zubietak ere goranzko joera hartu dute. Gorakada nabarmena izan duten herrien artean, Senpere eta Doneztebe aipa daitezke. Senperen, 1960an 2.240 bizilagun ziren eta orain 6.039, ia %170 gehiago. Donezteben 785 biztanle izatetik 1.644 izatera pasatu dira 55 urtez, hau da, bikoitza baino gehiago. Leitzan %85,81, Beran %44,62 eta Saran %32,85 igo da biztanleria.
Beherakada handia izan duten herriak ere badira: sei herritan azken 55 urteotan erdia baino gehiago jaitsi da bizilagun kopurua. Aranok %69,84 biztanle gutiago ditu gaur egun, Ezkurrak %68 gutiago, Zugarramurdik %57,14 gutiago, Saldiasek 56,46 gutiago, eta Eratsun eta Beintza-Labaienek %56,42 gutiago. Goizuetan ere 1960an baino %44,67 gutiago dira eta Urrozen %43,71 gutiago. Arantza, Zubieta, Oiz eta Sunbillan ere %30 baino gehiago jautsi da biztanleria 1960tik.