Bi saiorekin hasi da asteburuan Nafarroako Bertsolari Txapelketaren 42.edizioa; larunbatean Iruñean eta igandean Irurtzunen. Lehen final-laurdenean Jon Barberena baztandarrak eskuratu zuen finalaurrekoetarako txartela eta igandeko bigarren final-laurdenean berriz, Julio Soto gorritiarrak. Bi bertsolari hauek datorren martxoaren 7an Berriozarren jokatuko den finalaurrekoan kantatuko dute.
Jon Barberena garaile Iruñean
Iruñeko Katakrak aretoa goraino beteta, 170 bertsozalek lehen final-laurdena bertatik bertara jarraitu zuten. Iruñeko alde zaharreko gazteen bertso-eskolako kideek agurra dotore eskaini ondoren, entzuleen arteko giro beroak lagunduta, oholtza gaineko sei bertsolariek Txapelketari hasiera polita eman zioten. Seikotearen artean bertsolari beterano bat, Bittor Elizagoien, hainbat urtez Txapelketatik kanpo egon ondoren lehiara berriz bueltatu dena.
Azkenean Jon Barberenak lortu zituen puntu gehien eta Berriozarko finalaurrekorako sailkatzea. Barberenaren atzetik puntuen arabera hurrenez hurren, Oier Lakuntza iruindarra, Aritz Saragueta beteluarra, Joxema Leitza arbizuarra, Bittor Elizagoien baztandarra eta Unai Uberetagoena tolosarra izan ziren. Bost bertsolari hauek gainontzeko final-laurdenetako puntuazioen zain egon beharko dute hurrengo fasera sailkatzen diren jakiteko.
Puntuazioa
Jon Barberena 253
Oier Lakuntza 246,5
Aritz Saragueta 234,5
Joxema Leitza 232,5
Bittor Elizagoien 229
Unai Uberetagoena 211,5
Julio Soto nagusi Irurtzunen
Igandean Irurtzunen jokatutako bigarren final-laurdenak segida bikaina eman dio Txapelketari. Sarrera guztiak aldez aurretik salduta, 150 bertsozalek Kultur Etxea bete eta adi segitu zuten saioa. Irurtzungo Atakondoa ikastetxeko ikasleek hasierako agurra kantatu ostean ekin zioten sei bertsolariek saio puntuagarriari eta azkenean puntu gehien batuta, Julio Sotok lortu zuen finalaurrekoetarako txartela. Sailkapenean atzetik geratu dira hurrenez hurren, Julen Zelaieta, Migel Mari Elosegi "Luze", Alazne Untxalo, Kotte Plaza eta Iban Garro.
Puntuazioa
Julio Soto 262,5 puntu
Julen Zelaieta 240 puntu
Migel Mari Elosegi "Luze" 239 puntu
Alazne Untxalo 236 puntu
Kotte Plaza 235 puntu
Iban Garro 226 puntu
Sotorekin batera, oso maila paretsuan ibili ziren bertsolariek, gainontzeko saioetako puntuazioen arabera lortuko dute finalaurrekoetara sailkatzea.
Nafarroako Bertsolari Txapelketak hurrengo asteburuan izango du segida, Zubirin egingo den hirugarren final-laurdenarekin.
Txapelketaren gaineko informazio guztia eta eguneratua www.bertsozale.eus atarian aurkituko duzue.