Zazpi Herrialdeen Kirol Txapelketa jokatu zen abuztuaren 24an Atharratzen (Zuberoa) eta hamar probatan aritu ziren Nafarroa, Gipuzkoa, Bizkaia, Nafarroa Beherea, Araba, Lapurdi eta Zuberoako kirolariak. Tartean izan ziren eskualdeko hainbat lagun, Nafarroako taldea ordezkatzen: sokatiran Amaiur eta Lesakako Beti Gaztekoak aritu ziren, koxkor biltzen Andoni Lasaga (Bera), lasto altxatzen Eneko Telletxea (Igantzi), harri jasotzen Unai Bertiz (Sunbilla), orga jokoan Joseba Petrirena (Bera) eta aizkoran Ander Erasun (Aurtitz). Hamar probetatik lautan nagusitu zen Gipuzkoako taldea eta berak eskuratu zuen txapela. Lokotx biltzen, lasto-altxatzen, arpanean eta sokatiran irabazi zuten gipuzkoarrek. Bizkaiko taldeak aizkoran, harri-jasotzen eta txingetan eskuratu zuen lehenbiziko postua. Nafarroako kirolariak, aldiz, proba bakarrean nagusitu ziren, ingude-altxatzen. Lapurdik zaku-lasterketan eta orga-jokoan irabazi zuen eta Nafarroa Behereak, Arabak eta Zuberoak ez zuten garaipenik lortu.Puntuak batuta Gipuzkoak 54 lortu zituen, Bizkaiak 51 puntu, Nafarroak 50, Lapurdik 44 puntu, Arabak 37, Nafarroa Behereak 19 puntu eta Zuberoak 12.