2014. urte bukaeran 1.184 langabetu zeuden Doneztebeko Enplegu Bulegoan izen emanak, baina urte hasieretako joera kaxkarrari eutsiz, ilbeltzean 74 lagun gehiago gelditu dira lanik gabe eta 1.258 langabetu zeuden ilbeltz hondarrean. Nafarroa osoan %3,44 goiti egin du langabeziak baina datu kaxkarrenak eskualdeak eman ditu, banaz bertzeko hori kasik bikoiztu egin baitu (%6,25 langabetu gehiago).
Urtarrilean 566 kontratu egin ziren Doneztebeko Enplegu Bulegoaren bitartez, horietatik 62 bakarrik mugagabeak.
Emakumeen artean eta zerbitzu eta industria arloan gehiago igo da langabezia
Adina eta sexuari dagokionez, 25 urtez goitiko gizasemeen artean 574 lagun daude langabezian, abenduan bezalaxe. Adin tarte horretako emakumeen artean, aldiz, abenduan baino 64 langabetu gehiago daude, 572. Beraz, gazteen artean jautsi da langabezia: 25 urtez beheitiko gizasemeen artean 2 lagun gehiago daude langabezian, 63 lagun, eta adin tarte horretako emakumeen artean abenduan baino 8 langabetu gehiago dago, 49 denera.
Zerbitzuen arloak segitzen du langabe gehien izaten, eta urtarrilean, gainera, 50 gehiago pilatu ditu, 808tik 858ra pasatuz. Industria arloan ere 25 langabetu gehiago daude, 184 denera. Eraikuntzan, berriz, 3 langabetu guttiago daude, 126. Nekazaritzan ere 4 lagun guttiago daude lanik gabe, 27 denera, eta aitzinetik lanik egin ez dutenen artean 63 lagun daude langabezian, abenduan baino 6 gehiago.