Charlie Hebdo astekari satirikoaren kontrako atentatuak samina, kezka eta haserre haundia sortu du Senperen ere. Cabu marrazkilaria zen ezagunena haurrentzat egiten ziren telebista saioetan agertzen baitzen duela zonbait urte. 1992az geroz, bertze motako marrazkiak egiten zituen Charlie Hebdo mugarik ez zuen agerkari umoretsuarentzat. Bere heriotzak zur eta lur utzi ditu herritar frango. Usaian ez dira hainbertze astekari saltzen gure herrian baina atentatuaren ondoko ale berria erosteko 300 galde izan dituzte Lekuonaren etxean. Bertzalde, herriko eskoletan kazetari, marrazkilari eta juduen kontrako atentatuak aipatu dituzte ikasleekin. Solasaldiak burutu dituen irakasle batek dio kultura eta hezkuntza aterabide bakarrak direla islamarekin deus ikusteko ez duen fanatismoaren kontra borrokatzeko.
Parisen berean Jeremy Trottin kazetari senpertarrak hurbiletik segitu ditu erasoak eta ondoko egunetan egin diren mobilizazioak. Azken urteetan BFM-TV albistegi telebistarentzat lan egiten duen gazteak dio «egun gogorrak izan direla». Jeremyren ustez «zoritxarrez arazoa ez da batere konpondua 10 urteko haur askok ez baitute minutu bateko isilunea egin nahi izan». Frantziako lehen ministroak iragarri dituen segurtasun neurri berriak ez dira aski izanen egoerari buru egiteko, arazoa sakonagoa baita Trottinen arabera.