Baztaneko borda inguruan baseliza izaten zen XVIII. mendera arte. 1721eko uztailaren 19an gotzaindegiko ordezkari batek Ezkurra bisitatu zuen eta alkate eta bizilagunei eskatu zien ermita hori moldatzeko, oso egoera kaxkarrean eta erortzeko puntuan zegoelako. Hala ez egitekotan, sei hilabeteren buruan itxi beharko zela.
Sei urte beranduago ordezkari hori bera etorri zen, beste baseliza bat herritik hurbilago egitea eskatuz, baina hori bai, bakarrik bizilagunen diru ekarpenekin, hauek erosi behar baitzuten lurra eta eraiki.
Lehenagoko baseliza zegoen lekuan gurutze bat jartzeko ere aholkatu zuen, bertan izan zela seinale gisara. Horrelaxe egin zuten eta harrizko gurutzea jarri zuten, baina denborarekin zati bat erori zen. Orain, lurraren jabe den Santos Telletxeak ingurua garbitu eta falta zen zatia jarri du, eta aski dotore gelditu da lekua.
1727ko apirilaren 27an jakinarazi zion Ezkurrako alkateak gotzaindegiairi Gurutze Sainduaren baselizako lanak bukatuak zirela eta herrira etortzeko, lekuak meza emateko baldintza guztiak betetzen zituela ziurtatzera.
Baina gaur egun, urtean bitan bakarrik erabiltzen da Gurutze Sainduaren ermita hori, uztailaren 3an eta irailaren 14an. Horregatik, interesgarria izanen litzateke urteko gainerako egunetan beste erabilpenen bat topatzea eraikinari.