Lekarozko Larraldea sagardotegian irekiko da ortziralean, urtarrilaren 16an, 2015eko txotxeko sagardotegi denboraldia. 14:30 aldera eginen da ekitaldi ofiziala eta Baztango bazterrak bere misteriozko trilogian ezagutzera eman dituen Dolores Redondo idazlea izanen da sagardo berria dastatzen lehena. Lekarozko Larraldearekin batera, Lesakako Linddurrenborda, Berueteko Behetxonea, Aldazko Martitxonea eta Lekunberriko Toki Alai sagardotegiek osatzen dute Dolarea, Nafarroako Sagardotegien Elkartea eta aurten 300.000 litro eskas kupeleratu dituzte.
2011n ere Lekarozen ireki zuten Nafarroako sagardotegi denboraldia eta orduan Undiano Mallenco futboleko epaile ezaguna izan zen arduraduna. Iaz, berriz, Lesakako Linddurrenbordan ireki zuten denboraldia Patxi eta Donato Larretxea anaiek.