Eguberrietan eta, azkeneko urtetako ohiturari jarraituz, Olentzero eta Mari Domingi Doneztebeko karriketan barna ibili dira bertako dantzariek, musikariek eta doneztebarrek lagunduta. Urtero, Olentzeroren etorrerak gau horren magia eta ospakizuna gozaraztera murgiltzen gaitu. Gau magikoa benetan, norberak zentzua bilatuko dio, nahi duen kutsua emanez: kristaua edo bestelakoa. Edozein izanda ere, ez dago zalantzarik zirraragarria dela egun horretan bizi dugun giroa. Gau magiko honetan neguko solstizioaren oihartzuna agerian gelditzen da. Tradizio paganoa eta erlijiosoa, biak uztartuta, biak orekan, biak unibertsalak… Erreka Dantza taldeak musika, dantza eta suzko elementuak nahasita, ongi harmonizatuta, Olentzero eta Mari Domingiri agurra eginez sinesmen zaharra eta kristaua ederki uztartu ditu aurtengoan ere. Batzuendako Jesusen jaiotza beste batzuendako ospakizun unibertsalagoa izanen da. Ama-lurra lotan dago, gure mendietako hartza neguloan baina udaberriko ekinozioa iristean, hartzarekin batera, ama-lurra esnatuko da, indarrik gabe izan den Eki edo Eguzki (euskaldunontzat bizitzaren jainkosa) berpiztuko da, uztak azalduko dira eta gizakiaren bizimodua lur azalean izanen da, aisago, errazagoa, neguko leize-zuloen babesa, behin behinekoz baztertuta. Itxaropen hori izanda, gure pizkundea ere gauzatuko dela amestuko dugu. Ea magia horrek 2015. urtean zehar irauten digun!