Abenduaren 13an jokatu zituzten Iruritako Aranabia pilotalekuan Baztan-Errekako XV. Paxaka txapelketako finalerdiak. Honenbertzez, abenduaren 20an jokatuko diren finala eta hirugarren posturako partida nola gelditu diren erabaki da.
Lehenbiziko finalerdian, Irurita Ek (Oskar Urrutia, Joxe Mari Salaburu eta Egoitz Prim) 9-4 irabazi zion Irurita Bri (Xabier Barberena, Cesar Iñarrea eta Xabier Bazterrika). Launako berdinketaren ondotik, bortz joko segidan egin zituzten finalista izanen direnak.
Bigarren finalerdian, Elizondok (Gorka Urtasun, Juan Mari Maia eta Jon Sansiñena) 9-6 irabazi zion Irurita Cri (Iñaki Etxandi, Mikel Ballarena eta Jagoba Ramos). Hasieran Iruritakoak aitzinetik izan ziren (0-1 eta 1-3), baina hiruna eta launa berdindu ondotik, 7-4 aitzindu ziren elizondarrak eta azkenean 9-6.
Finala abenduaren 20an Iruritako Aranabian
Gauzak honela, abenduaren 20an jokatuko dituzte hamabosgarren paxaka txapelketako hondar partidak Iruritako Aranabia pilotalekuan. Larunbat arratsaldeko 5etan hirugarren posturako lehia izanen dute Irurita B eta Irurita Ck eta ondotik, 18:15ean, final handia Elizondok eta Irurita Ek.
Finala bukatu bezain laster, txapelak eta sariak banatuko dituzte. Gero, mila euroren zozketa eginen da.