Sustrai Colina urruñarra da Ipar Euskal Herriko bertsulari xapeldun berria Xilabaren finalean pundu gehien bildu baitzuen bere bertsokera paregabeari esker. Txomin Ezponda jatsuarrak (Senpererekin lotura hertsia duen baxe nafarrak) eman zion xapela bertsulari gazteari Xilaba xapelketaren finala hondarrean. Baionako Lauga aretoan 1500 bertsuzale bildu ziren, hauen artean adin guzietako senpertarrak. Herriko bertsuzaleek Xilabaren kanporaketa batez gozatu ahal izan zuten jadanik Larreko gelan eta orain Sustraien garaipena preziatu zuten Lapurdiko hiriburuan.
Finala bururatu bezain laster Andoni Iturriotz bertsuzale ezagunak zioen poz haundi bat sentitzen zuela bertsularitza berpizten ari delakoan. Larraldea etxaldeko jabeak badu hortan zerikusirik Euskal Herri osoko bertsularien esku utzi baitu kulturgunea eta bertan biltzen baitira aste guziz elgarrekin kantatzeko. Iturriotzek begi onez ikusten du berpiztea bereziki Senperen bertsuzaletasun haundia izan duen herria baita bere hitzetan. Andoni astearteroko biltzarretarat joaten da eta Larraldean pozik egoten da bertsulari gazteak entzuten. Xilabaren finaleko kartzelako gaian aitak sekulan aipatu ez zuen sekretua aipatzen zen. Ideia hau Iturriotzen bihotzeraino sartu zen aita zenaren istorio aberatsa aski berant jakin baitzuen kusin batek erranik. Geroztik aita zenaren memoriak argitaratu ditu Andoni Iturriotzek Larraldea etxeko jabe esku zabalak.