Malerrekako, Baztango, Bortzirietako eta Bertizaranako Udalek, Gizarte Zerbitzuen bitartez, zonaldeko institutuekin eta Cederna Garalurrekin elkarlanean, eskualdeko helduentzako irakaskuntza programa publikoa eta doakoa indarrean paratu nahi dute. Jadanik Nafarroako hainbat eskualdetan indarrean dago helduentzako irakaskuntza zerbitzua, gurean berriz, ez. Huts handia sumatzen dute udalek, institutuek eta bertze erakundeek, ikasketak bukatu gabe utzi zituenak aukerarik ez baitu gaur egun inguruan ikasketak bukatzeko.
Maite Oteiza, Baztango udaleko zinegotziak azaroaren 18an Malerrekako Mankomunitatean egindako aurkezpenean adierazi duenez, «hemezortzi urtetik goitiko herritarrei oinarrizko ikasketak eskaintzea dute helburu; doakoa eta hezkuntza sare publikoaren bitartez».
Zerbitzu honek honako aukera hauek eskaintzen ditu:
• Alfabetatzea (irakurtzen eta idazten ikastea, kalkulua, ordenagailua erabiltzen ikastea).
• Oinarrizko formazioa (kalkulua, Sistema Metriko Hamartarra, geometria, ortografia, gramatika, idatzizko adierazpena).
• Hizkuntzaren hastapenei buruzko ikastaroa atzerritarrentzat.
• Derrigorrezko Bigarren Hezkuntza.
Zerbitzu honekin eskualdean bertan aukera eman nahi diete bere garaian ikasketak akitu gabe utzi zituzten herritarrei zein bere ezagutzak handitzeko grina eta gogoa dutenei oinarrizko ikasketak buka ditzaten. Parte-hartzaileek Bigarren Hezkuntzako titulazioa eskuratzeko eta beste ikasketekin jarraipena izateko aukera izanen dute.
Zerbitzu hau abian jartzeko eta antolatu ahal izateko, gure zonaldeko herritarren beharrak ongi aztertu eta zehaztu behar dituzte. Hori dela eta, helduentzako oinarrizko irakaskuntza zerbitzuan jakin-mina duenak zonaldeko Gizarte Zerbitzuetara jo dezake:
Malerreka-Bertizarana: Malerrekako Mankomunitateko Gizarte Zerbitzuak. Tel: 948 451 746.
Bortziriak: Bortzirietako Gizarte Zerbitzuak. Tel: 948 635 036
Baztan: Baztan, Urdazubi eta Zugarramurdiko Gizarte Zerbitzuak. Tel: 948 580 006.
Bertzalde, heldu diren hilabeteetan bandoak eta triptikoak banatu, eta batzar informatiboak antolatuko dituzte zonaldeko herrietan sortzen ahal diren zalantzak argitu ahal izateko. Malerrekako Mankomunitatean abenduaren 11n izanen da, 19:00etan; abenduaren 17an Baztanen, Elizondoko Arizkunenean 19:00etan eta abenduaren 18an Berako Beralandetan, 19:00etan.
Heldu den ikasturteari begira nahi dute martxan jarri zerbitzua. Irakasleak, institutuetako plantilletakoak izan behar dute eta plantilla horiek martxo alderako osatzen direnez, ordurako jakin beharko litzateke ikastaro hauetarako eskaririk baden ala ez.