Nafarroako bigarren mailako aizkora txapelketaren finala jokatu zen azaroaren 14an Doneztebe, ferien baitan. Elizondoko uztailaren 27an jokatutako kanporaketan sailkatutako lehen bortz aizkolariak aritu ziren eta bakoitzak bi kanaerdiko, bi 60 ontzako eta oinbiko bat moztu behar izan zituen.
Kanporaketan bezalaxe, finalean ere Otsagiko Iker Vicente nagusitu zen, finalistarik gazteena. 15 minutu eta 8 segundo behar izan zituen lana burutzeko. Zubietako Mieltxo Mindegiak ere lan polita egin zuen (15:56). Biek mailaz igotzea lortu dute eta beraz, heldu den urtean lehen mailako aizkora txapelketan parte hartuko dute.
Olagueko Aitor Senosiainek osatu zuen podiuma (17:43). Azken postua saihesteko borroka gogorra izan zuten Etxarri Aranatzeko Goizeder Beltzak eta Aresoko Asier Pellejerok. Azkenean, Beltzak lortu zuen laugarren postua (19.30) eta Pellejerok 9 segundo gehiago behar izan zituen lana bukatzeko (19:39).
Txapelketarekin batera, Inaxio Perurenak harrijasotze erakustaldia eskaini zuen eta Xanta Souzak txinga-eramate erakustaldia egin zuen.