Betilan eraikuntza enpresak bukatu ditu Elizako lanak. Kanpoko itxura polita gelditu da. Teilatuko goiko alderdia guztiz berritu dute, egur zaharrak kendu eta teila berriak jarrita. Beheko alderdian, sarrerakoan, han zeuden teilak ongi ezarri dituzte. Horrela itaizurrak desagertuko dira.
Eliza estilo gotiko-errenazentistan egina da eta gurutze gotikoa, amabirjinaren XVI. mendeko taila eta 1672an egindako zilarrezko gurutzea dira aipagarrienak.
Aldare nagusia 1722an berreraiki zen, Ezkurrako jaunaren iritziaren kontra. Jauntxo hau herriko alkate ere izaten zen eta apeza izendatzeko eta hamarrenak kobratzeko eskubidea izaten zuen. Baina eliztarrek eliza hondatua zegoela ikusirik, eliz agintariengana jo eta hauek Ezkurrako jauna behartu zuten herritarren eskaera onartzera, baina oraindik mantentzen den letreroa jarriarazi zuen: «Este retablo se puso por devoción y a expensas de los vecinos de esta villa con consentimiento del patrono de la iglesia».
Eliz barnean, jauntxoaren familiak bere eserlekua izaten zuen eta familiko kideak bakarrik lurperatzen zituzten azpian. Baina behin, 1679an, “palazianoak” falta zirela hil zen Martin Telletxea apaiza eta emakume batzuk banku azpian lurperatu zuten. Baina Maria de Ezkurra jauntxoaren alaba (Luis Beaumontekin ezkondua zen, bi familien armarriak oraindik ageri dira ezkerreko aldarean) enteratu eta gorpua aterarazi eta hilerrira eramanazi zuen. Emakumeek 20 liberako isuna ere ordaindu behar izan zuten.