Nazio mailan ezarri diren erronka berriak eta adostutako egutegiaren barrenean murgilduta, Malerrekako Gure Esku Dago ekimena sustatzen duen batzordeak berriz ere lanari ekin dio. Ikasturte honetan abiatutako bidea eta ildoa zehazteko bilera idekia deitu dute batzordekideek, ekimen hau bultzatu nahi duen guzien ekarpenak jasotzeko asmoz. Horretarako, urriaren 31n, ortziralean 20:00etan Donamariako erabil anitzeko aretoan bilera idekia antolatu da. Egun horretan batzordekideek Gure Esku Dago ekimenaren egoera azalduko dute eta etorkizunean batzorde hau agenda, lehentasunak eta lanak zehazten saiatuko da. Bileraren ondotik berendu goxoa izanen da.
MOSAIKO ERRALDOIA
Hitzordu horretaz gain ere, batzordeak jendea animatu nahi du azaroaren 8an Donostiako Zurriola hondartzan 11:00etatik 13:00etara osatuko den mosaiko erraldoian parte hartzera.