Con la Iglesia hemos topado, liburuaren lehendabiziko atalak dioen bezala Elizak eta pilotak binomio unibertsala osatzen dute. Pilota eta elizaren arteko harremanak abiapuntutzat hartu ditu Tiburtzio Arraztoak Entre Dios y la pelota liburua argitaratzeko.
Lau urteko dokumentazio lanaren ondotik pilota eta, batez ere, laxoarekin maiteminduta dagoen egile honek historikoki apezek pilota munduarekin izandako harremanak harilkatu ditu. Liburutik azpimarratzen ahal diren kapituluen artean honako hauek dira: joku honen udal arautegia, elizak ezarritako debekuak, apezek nola saihesten zituzten debeku horiek, pilota jokuak eremu sakratuetan (eliza atarietan, kanposantuetan), enparantza eta frontoien inaugurazioetan zer nolako bedeinkazioak egiten ziren, apustuak, pilotaren patroiak (San Francisco Javier…). Erabilitako iturriek eta dokumentatutako materialek liburuari balioa ematen diote, baina bitxikeriek eta hurbileko testigantzek irakurketa atseginagoa errazten dute. Testigantza horietan hainbat apezek egindako ekarpenak ere azpimarratu behar dira. Azken finean, historia nagusiaren gertutasuna jende apalak egiten baitu. Liburuan agertzen diren 100 argazki baino gehiagok ere testuaren balioa eta indarra edertzen dute.
PILOTARI LOTUTAKO IBILBIDE OPAROA
Liburu honekin Tiburtzio Arraztoak osatzen du bere liburu eta dokumentu bilduma, pilota eta laxoari buruzko beste 4 liburu eta dokumental bat egin baititu. Iruritan jaioa baina duela anitz Donezteben finkatutako irakasle jubilatu honek ttikitatik, batez ere, Jesus Jaimerena apezarengandik jaso du pilota eta laxoarekiko zaletasuna, maitasun bihurtu dena. Honi esker Arraztoak laxoaren inguruan egindako lan emankorra aski ezaguna dugu denok. Espero dezagun bere pilotakaden oihartzuna anitz urtez entzutea bai gure frontoietan nola argitalpen gehiagotan ere.