Julen San Miguel Doneztebeko erremontelaria, Lander Santamaria Elizondoko kazetaria, Ana Casares atleta, Eloy Moreno idazlea (El boligrafo verde eleberriaren egilea, bertzeak bertze), Helena Bonhome gastronomiako blogaria eta Gregorio Giménez Romero, Kataluniako pentsiodunen elkarteko demokratikoko presidente ordea dira Nafarroako Onddo eta Zizen Kofradiako Ohorezko kide berriak. Halaxe izendatu zituzten urriaren 5an Elgorriagan Kofradiak egin zuen hogeita batgarren besta egunean.
Ekitaldia, Iruñeko Santa Maria La Realgo ahots lodien abesbatzak kantatutako mezaren ondotik egin zen eta ospakizunean, bertze hainbat kofradietako kideek ere parte hartu zuten. Zubietako joaldunak eta txaranga ere karrikaz karrika ibili ziren.
Juanito Mariezkurrenaren omenez egindako kaxuela lehiaketarako onddoak kanpotik ekarri behar izan dituzte aurtengoan, oraingoz ez baita onddo eta ziza gehiegirik gure mendietan. Halere, 200 bat kilo sukaldatu eta dastatu zituzten Elgorriagan, «gehienak Ultzamatik ekarriak».
Ondoren, San birila hotelaren izenean, pisu handiena zuen onddoaren lehiaketa egin zen lehen aldiz eta oraindik gutti agertu direnaren seinale, bi aurkeztu zituzten. Lehen postuan Cristina Olazar geratu zen eta beretzat izan zen saria: Sueño San Birila izeneko aste bukaera hotelean. Ondotik, lehiaketan egin ziren onddoak, gazta, urdaiazpikoa eta txistorra dastatzeko aukera izan zuen plazara bildu zen jendeak. Besta akitzeko, bazkaria izan zen bainu etxean.Txarrena, eguraldi pattala izan zela goizez eta onena, berriz, eguna borobila izateko Onddo eta Zizen Kofradiak egindako lan bikaina.