Berri onak bat bertzearen ondotik ageri zaizkie herriko errugbilariei. Ekainean, Frantziako txapelketa irabazi zuen bere mailan SPUC taldeak; eta duela egun batzuk Charles Ollivon Aviron Bayonnais taldean ari den 21 urteko senpertarra hautatu dute Frantziako selekzioaren ikastaroetan aritzeko. Ikastaldietan herrialde osoko 30 errugbilari trebatuko dira selekzioak laster jokatuko dituen partidei begira.
Biziki pozik eta harro dago sailkatua izateaz. Maila horretarat heltzen den gazteenetakoa da 2 metrako garaiera eta 110 kilo pisatzen dituen herritarra. Eskerrak eman dizkio Aviron Bayonnais taldeari ainitz zor omen baitio. Ollivonek dio gaitzeko maila erdietsi duela azken urteetan izan duen formakuntzari esker eta orain fruituak ageri direla. Baionan dituen trebatzaileek ere argi dute fisikoki prest dela goi mailako lanarentzat eta oraindik gehiago ikasiko duela Frantziako jokalari hoberenekin formakuntzak eginez. Ollivonek pilota maite izan du ttikitatik; eta maiz aritu da joko hortan, hasteko aire hartze denboran eskolan ibilki zelarik eta horrek errextasunak eta arintasuna ematen dizkio. Dena den, errugbia da oroz gainetik gustatzen zaion kirola. Ildo hortan aita, anaia eta hurbileko lagunak bidelagun izan ditu eta dauzka gaurko egunean ere. Nerabezaroan luzaz aritu da trebatzen Urdazuri aldean baina dioen bezala, gero noizbait urdina eta gorriaren artean hautatu behar da. Eta dudarik izan gabe Avironen hautua egin zuen. Senperen kadet mailan ari zelarik baionesak berak etorri zitzaizkion bila 16 urte zituela. Orain esperantza kontratua dauka Baionarekin 2016ra arte. TOP14 txapelketan jokatu behar dituen partidak eta selekzioaren ikastaldiak uztartzen ditu eta ator urdina janzteko itxaropenarekin lasterka segitzen du baloiaren gibeletik.