Los Muppets eta Ocho apellidos vascos filmek emanen diote aurten zinemaldiari hasiera urriaren 12an. Laugarren ikasturtea da Erreka eta Mendaur guraso elkarteek herriko kulturari bultzadatxoa eman nahian zine emanaldiak antolatzen dutela. Denboraldia aurreratu dute aurten (azaroan hasten baitziren) eta Aste Santuan akitzeko asmoa dute. Beraz, ia sei hilabetez hamabortzero bi pelikula, 16:30ean eta 18:30ean pantailaratuko dira . Osotara 24 edo 26 pelikula ikusteko aukera izanen da euro baten truke. Ekimen hau aurrera atera ahal izateko Burrunbak utzitako ekipo teknikoa erabiltzen da, publizitatea eta kartela Doneztebarrak Merkatari eta Zerbitzu Elkartearen diru-laguntzari esker egiten da eta Udalak egoitza erabiltzea baimentzen du. Horretaz gain eta batez ere, hainbat gurasoen inplikazioa ezinbertzekoa da emanaldi hauek burutu ahal izateko: txandak, bilerak, zine aretoaren garbiketa… Lortutako dirua, beste urtetan egin den bezala (proiektore berria, elikagai bankua, Enaitzen aldeko kanpaina…), ekipo teknikoan hobekuntzak egiteko eta hainbat ekimen solidario edo aisialdiko ekitaldiak antolatzeko erabiliko da.