Mendi bizikleta maite duenak ez du aspertzeko aukerarik izanen egunotan. Irailaren 21ean, Beti Gazte elkarteak antolatutako Lesakako mendi bizikleta ibilaldia eta Bertizko Partzuergoak Behobia eta Bertizen artean antolatutako Bidasoko Bide Berdearen martxa eginen dira. Irailaren 28an, berriz, Gure Txokoak antolatutako Berako Mendi Bizikleta ibilaldiaren 22. edizioa eta Plazaolako bide berdearen martxa eginen dira (VIII. Maratoi Erdiarekin batera).
Lesakan bi ibilbide eskainiko dituzte aukeran igandean: 45 kilometro luze eta 1.700 metroko desnibela duena luzeena eta 34 kilometro luze eta 1.100 metroko desnibelekoa laburrena. Igandean 09:00etan abiatuko dira txirrindulariak eta 08:00etatik 08:45era izanen dute izen emateko aukera (10 euro federatuek eta 15 euro federatu gabekoek).
Egun berean, Bertizko Partzuergoak Bidasoko Bide Berdetik VII. BTT martxa proposatu du Behobia eta Bertiz artean (42 km.). Haur eta familientzako ibilbidea ere izanen da, Sunbillako garbitegitik aterata (15 km). Izen-emateak egun berean egin daitezke (helduek 10 euro eta 8-14 urtekoak 8 euro ibilbide luzean eta 5-3 euro laburrean), baina Bertizeko parkinetik Behobiako irteera puntura garraioa nahi duenak irailaren 18ra arte erreserbatu dezake partzuergoan.
Beran ohiko ibilbideak izanen dituzte hilaren 28an, 09:00etan abiatuta, baina alderantzizko norantzan, «politagoa eta gogorxeagoa» antolatzaileen ustez. Ibilbide luzeak 33,5 kilometro ditu eta laburrak 22 kilometro. Haurren ibilbidea (ibilbide ttikia) ere desberdina izanen da aurten. Haundiak atera ondotik, haurrak furgonetan Landagaitara goitu eta bertan emanen diote hasiera ibilbide ttikiari.