Emakumeen Munduko Lehen Mendi Maratoia burutu zen irailaren 7an Sunbillan. Emakumeen artean kirola sustatzea zen probaren helburua eta horregatik maila desberdinetara egokitutako ibilbideak prestatu zituen Abiatu Kirol Klubak, probaren antolatzaileak. Maratoian, 44 partehartzaileen artean Maite Maiora gipuzkoarra nagusitu zen, 42 kilometro luze eta 2.420 metroko desnibela zuen ibilbidea, 3 ordu eta 52 minututan osatu ondotik. Kantabriako Azara García de los Salmones izan zen bigarren bortz minutara eta Laura Sola nafarrak osatu zuen podiuma, 4 ordu eta 12 minutuko lasterkaldiaren ondotik. Sprintean nagusitu zitzaion Leire Fernandez, 16 urteko gazte errenteriarrari.
LASTERKETA BEREZIA
«Berezia izan da, lehen aldiz emakumeak bakarrik aritu gara korrika eta ezin nuen hutsik egin»
Maite MAIORA
800 Dukadoko irabazlea
Maratoi Erdiari dagokionez, 105 korrikalarien artean Melissa Gali valentziarra nagusitu zen, 2 ordu eta 10 minutu deborarekin, Dubes Claire frantziarraren (2:12:51) eta Zaldibiko Laida Elizegiren (2:18:46) aitzinetik.
168 metroko desnibela zuen sei kilometroko ibilbide herrikoian, ehun emakume baino gehiagoren artean, Pasaiako Inma Cruz nagusitu zen (31:08), Gasteizko Arrate Albaina (31:19) eta Uharteko Henar Etxeberriaren aitzinetik (31:29).
21 kilometroko oinezko martxan ere 127 kirolarik hartu zuten parte eta 800 metroko haurren lasterketan 140 neska-mutikok.
ARRAKASTA HAUNDIA
Bere lehenengo edizioan 800 dukadok parte hartzaile kopuru ezin hobea lortu du. Lasterketa zeharkatzen dituen herrien biztanleen konpromezua eta laguntza handia izan da antolakuntzan. Gainera, babesle gisara, bereziki aktibo izan dira ondorengoak: Sunbilla, Doneztebe, Elgorriaga eta Narbarteko Udalak, Nafarroako Gobernua, Lorpen, Elgorriagako Bainuetxea, Cederna-Garalur, Caja Rural, Ternua, Sunbite, eta Nafarroako Fisioterapeuten Eskola Ofiziala .Lasterketak lehen urratsa eman du bere helburua lortzeko: emakumeen trail-ean erreferente izatea.