Boletin berezian bildua ageri denez, ikastaro ezberdinetan izen emateko epea irailaren 19an bukatuko da. Parte-hartze handia espero da, ikastaro aukera zabala izateaz gain, interes handikoak direlako. Gainera, horietako batzuk (informatikakoa, Aktiba zaitez eta Irribarre batekin ernatzea) guztiz doan eskainiko dituzte. Hau idazterako orduan, irailaren 9an, 110 bazkidek emana zuten izena.
ARANTZAZU ETA LOIOLARA BIDAIA
Azken urteetako ohiturari eutsiz eta Arantzazuko Amabirjinaren bederatziurrenaren lehen egunarekin bat eginez, Arantzazu eta Loiolara bidaia egin zuten Arkupeak elkarteko 230 bazkidek abuztuaren 31n. Aurten, gainera, igandearekin suertatu zenez, beste bisitari ugarirekin bat egin zuten Arkupeak elkartekoek. Aitortza komunitarioarekin hasi zen eta hori jendearen gustokoa da, apezari pekatuak eta penak aitortu ordez, apezek eskuak jartzen baitizkiete buruan aitortzaileei. Eguerdiko meza seriotasun handikoa izan zen, 20 apez baino gehiagok eta ehunka sinesdunek hartu baitzuen parte.
Ondotik, Azpeitiko Kiruri jatetxeko bazkaria bikaina izan zen, baita Jose Angelekin egindako dantzaldia ere. Batzuk, San Inazioren basilika bisitatzeko aprobetxatu zuten, jatetxetik gertu baitago.