Abuztuaren 14ko gauean hasi ziren festak, Barranka ostatuan afaria eginez eta ondoren Jose Angelekin dantzaldia izan zen. Biharamunean, Meza Nagusiaren ondoren, Doneztebeko dantza taldeak bere saioa eskaini zuen eta arratsaldean aizkora apustuaz gozatzeko aukera izan zen. Erasun eta Saralegi, Rekondo eta Mugertzaren kontra aritu ziren eta azken hauek irabazi zuten zortzi segundoko aldearekin. Hirugarren enborra gogorra atera zen eta horrek eragina izan zuen, beste bikoteak ordurako hartutako abantaila galdu egin baitzuen.
Abuztuaren 16an, berriz, mus txapelketa jokatu zen eta hamabi bikotek parte hartu zuten. Guztien artean, Txuma eta Xabi nagusitu ziren eta Jose Mari eta Julian azpitxapeldun gelditu ziren. Migeltxo eta Cristobal hirugarren eta Jose Luis eta Joxe Martin laugarren.
Haurrak ere eguneko protagonistak izan ziren: jokoetan aritu ziren, txokolatea ere dastatu zuten eta Ines Bengoa ipuin kontalariarekin udaletxean bildutako 50 bat neska-mutikok ederki pasatu zuten. Ilunabarrean, festetan ohitura bihurtu den ekitaldiaren txanda etorri zen: herriko gazteen arteko herri kirol saioa. Hogei kirolarik parte hartu zuten. Egun horretan Oihana eta Oihanak jo zuten musika.
AIZKORA TXAPELKETA
Igandearen Nafarroako III. Mailako Aizkora Txapelketa jokatu zen. Oier Kañamares (Arostegi), Mikel Indakotxea (Zubieta), Joxean Etxeberria (Ziga) eta Miguel Angel Etxeberria eta Pello Telletxea (Beintza-Labaien) aritu ziren.
Cipriano Telletxeak gidatutako taldea arduratu zen egurra jartzeaz, eta proba bukatutakoan ere beraiek izan ziren hondarrak bildu eta frontoia arratsaldeko pilota partidetarako txukun-txukun utzi zutenak. Lerro hauen bidez boluntario guztiei gure esker onak eman nahi dizkiegu musutruk egiten duten lanagatik.
Finala hasi aurretik, Azpirozko Mikel Lasartek motozerrarekin lore dotorea ere egin zuen, eta egurrezko beste bi irudirekin batera zozketatua izan zen.
Gainerakoan, aizkolariak hirugarren enborrera arte nahiko berdintsu ibili ziren, baina hortik aurrera Miguel Angel Etxeberria gailendu zen. Azken bi enborretan Mikel Indakotxea eta Joxean Etxeberria lehian ibili ziren, baina azkenean Indakotxea nagusitu zen. Kañamares laugarren eta Telletxea bosgarren sailkatu ziren.
Proba bukatutakoan, Mikel Lasartek berriz ere motozerrarekin duen abilidadea erakutsi zuen eta hontza eta onddo bat egin zituen.
Aizkora txapelketako sari banaketan, Miguel Angel Etxeberriak Julian Gogorza alkatearengandik jaso zuen txapela. Bigarren gelditu zen Mikel Indakotxea izan zen txalotuena, bere herritik koadrila ederra bildu baitzen. Honek eta Joxean Etxeberriak trofeoa jaso zuten.
Egun horretan arratsaldez bi pilota partida jokatu ziren, kadeteena lehena eta afizionatuena bestea eta ondotik Fidelek alaitu zuen giroa.
BAZKARI JENDETSUA
Festak borobiltzeko, azken egunean frontoian herri bazkaria egin zen, Jose Luis sukaldari handiak prestatu eta bere laguntzaileek zerbitzatu zutena. Talde honi esker 108 lagunek menu goxoa dastatzeko aukera izan zuten. Postrearekin batera Erramun Martikorenaren saioaz gozatzeko aukera ere izan zen, Jose Angel akordeoilariak lagunduta. Aski ezagunak diren kantetan parte hartu zuten bazkaltiarrek: Ameriketara noa, Amodioa zoin den zoroa, Xalbadorren heriotzean, Baigorriko herria, Erribera...
Nahi zuen guztiak dantzatzeko aukera izan zuen 22:00 arte eta horrela bukatu ziren aurtengo festak.