Ikasturte berriari begira, Bortzirietako Euskara eta Malerrekako Mankomunitateek, Baztango Udalak eta Nafarroako Iparraldeko Euskara Mankomunitateak herritarrei euskara ikasi eta hobetzeko deia luzatu diete. Azaldu dutenez, «Nafarroako mendialdean euskarak gero eta toki handiagoa du gizarte bizitzan, herritar anitzek bere eguneroko jardunetan erabiltzen du eta haur-gaztetxo ia guztiak hizkuntza horretan eskolatzen dira». Hala, euskara zerbitzuek uste dute «gaur egun euskaraz ongi moldatzea, hala ahoz nola idatziz, gero eta beharrezkoagoa dela edonon eroso aritzeko». Eta horretan laguntzeko «gure eskualdeetan lanean ari diren euskaltegiek urteetako esperientzia eta eskarmentua dutela» gaineratu dute: «euskara irakasteko metodo errazak, komunikazioan oinarrituan, erabiltzen dituzte eta, aurrez-aurreko klaseak eskaintzeaz gain, internet bidezko ikastaroak nahiz autoikaskuntzarako aukerak ere ematen dituzte».
Euskaltegian izena emateak dakarren gastua arintzeko euskara zerbitzuek diru-laguntzak eskaintzen dituztela ere oroitarazi dute euskara zerbitzuek. Bortzirietako Euskara eta Malerrekako Mankomunitateek, erraterako, ikasle, langabe eta zailtasun ekonomikoak dituztenendako diru laguntzak eskaintzen dituzte; Baztango Udalak euskara ikasleendako, bereziki langabe eta guraso direnendako, laguntzak ematen ditu eta Nafarroako Iparraldeko Euskara Mankomunitateak ikasle guztiendako bekak eta langabeendako diru-laguntza bereziak ematen ditu.
Euskaltegiak:
• Lesaka: 948 637796
• Doneztebe: 948 451555
• Leitza: 948 610776
• Elizondo: 948 452471
• Larraintzar: 948 604704
• Lekunberri: 948 604704
EUSKALTEGIAN IBILITAKOEN BIZIPENAK
Maria IRURUETA | DONEZTEBE
«Izan ditudan lan guztietan primeran etorri zait euskaraz idazteko gaitasuna izatea»
«Ez nuen aukerarik izan ikasketak euskaraz egiteko, euskara etxean eta kalean ikasi nuen. Baina nire euskara hobetzeko eta aberasteko euskaltegira joatea erabaki nuen. Oso pozik nago hartu nuen erabakiaz, konfidantza handia lortu nuelako euskara erabiltzeko orduan, bai ahozkoan, baita idatzizkoan ere. Izan ditudan lan guztietan primeran etorri zait euskaraz idazteko gaitasuna izatea. Ez naiz batere damutzen euskaltegian izena eman izanaz, anima zaitez».