Eguraldiak zalantza bat edo beste sortu arren, arbola altxatu eta bota arte ederki joan ziren festak. Azken urteotan bezala, herrikoiak eta parte-hartzaileak izan dira, eta eskertzekoa da parte hartu izana.
Larunbatarekin jokatu zen mus txapelketan, 18 bikotek parte hartu zuten eta Gorka Fuentes eta Lorentxo Santesteban izan ziren txapeldun. Bigarren Martuzeneko Jabier eta Maxux gelditu ziren eta hirugarren Leire eta Nerea Bazterrika ahizpak. Egun berean egin zen tortilla lehiaketan 13 partaide aritu ziren eta Lino Elizalde eta bere taldea izan zen txapeldun; bigarren Luismi Lameirhinas eta bere taldea gelditu zen eta hirugarren Fausti Juanikorena. Halere, guztiei oso onak atera zitzaizkien eta aski berendu goxoa egin zen tortillekin.
Gurasoek antolatutako haurren eguna ere ederki atera zen. Haurren bazkarian 84 neska-mutiko bildu ziren eta 30 guraso ondotik. Egun berean, plater tiroketa txapelketa jokatu zen eta Patxi Aldabe nagusitu zen; bere ondotik Josetxo Santesteban.
Azken eguneko herri bazkarian 40 lagun bildu ziren eta giro polita sortu zen Beñat Gaztelumendi eta Uxue Alberdi bertsolariekin.
Gazteek ere izan dute festen antolakuntzan tokia. Larunbat gauean, adibidez, afaria antolatu zuten plazan. Horrez gain, pilota txapelketak ere bai. Pala txapelketa mistoaren finala festetan jokatu zen. Oinatz eta Ainhoaren ordez, Imanol eta Olatz aritu ziren eta hauek irabazi zieten Beñat eta Mikeleri. Esku pilotan, berriz, Gorka eta Imanolek irabazi zuten, Beñat eta Mikelen aurka.
Eta hala, aizkora eta arpanarekin, estilo zaharrean arbola botaz agurtu zituzten herritarrek festak. Pedro Santesteban, Joxe Antonio Loiarte eta Markos Juanikorena arduratu ziren hortaz.