Irailarekin batera eskola eta institutuko ikasturtea martxan paratuko da, irailaren 5ean Haur eta Lehen Hezkuntzari dagokionez eta 10ean DBHkoari dagokionez. Aipatu behar da DBHn A eredurik ez dela izanen eta hizkuntza aukeraketa honetan ari diren ikasleek Lekarozera joan beharko dutela. Askin eskola txikiak ere udako oporraldiaren ondotik ikasturte berriari ekin dio.
Agorreta Musika Eskolak ere irailaren 8tik 12ra zabalduko du matrikulatzeko bigarren deialdia. Egun horietan 10:00etatik 12:00etara bertatik pasatzen ahal da izena ematera eta dagokion dokumentazioa betetzera. Berrikuntza gisa, ikasturte honetan 12 urtetik gorakoentzat instrumentua ikasteko aukera izanen da hizkuntza musikaleko klaseak hartu gabe. Beraz, gazte eta helduendako eskaintza zabaldu du Musika Eskolak.
Ikasturteaz gain, kirol jarduerak ere poliki-poliki martxan jartzen ari dira, bai Erreka taldean nola Doneztebe futbol taldean ere. Hauez gain, neguan kirol eskaintza zabala prestatzeari ekin diote hainbat antolatzailek: pilota, judoa, pilates, yoga, dantza-jazz...