Uztailean eta abuztuan laxoaz gozatzeko aukera ederra izan da Donezteben. Uztailean hasi eta abuztuan egin den gazteen laxoa txapelketan aritu diren zortzi taldeen artean, hiru Doneztebekoak izan dira. Honako jokalariak aritu dira: Doneztebe An Goio Mindegia, Aimar Jabalera, Urtzi Juanena eta Iñigo Belarra; Doneztebe Bn Gorka Iribarren, Iñaki Maylin, Mikel Tajadura eta Eloy Gartzia eta Doneztebe Cn Unai San Miguel, Aimar Sarratea, Joseba Bengoetxea, Pello Sein eta David Mitxeo.
Bi itzuliko ligaxka jokatu ondotik, lau ailegatu dira finalerdietara eta tartean Doneztebe A eta B. Irailaren 6an eta 10ean jokatuko diren azken bi finalerdien ondotik, irailaren 13an Oizen izanen da finala. Ea herriko talderen bat ailegatzen den eta helduen txapelketan bezala, txapela gurera ekartzen duen. Emaitzaz haratago, aipatu behar da harrobi ikaragarri polita dagoela gurean, pilota modalitate honen alde egindako lanari esker.
Arrakasta horren bertze adierazle bat da Bear-Zana plazan egin den Laxoako II. Tornea. Iaz bezala, aurten ere herriko zortzi taldek parte hartzekoa zuten abuztuaren 30ean egitekoa zen txapelketan.
Horiez gain, abuztuaren 22an Ziburuko plazan urtero antolatzen den Laxoa Torneoa jokatu zen, Baztan-Bidasoaldeko Laxoa Elkarteko eta Donibane Lohizuneko Luzaz Gazte taldeekin. Herriko bi jokalari aritu ziren. Eta abuztuaren 23an Bilboko Aste Nagusian paxaka partida bat antolatu zuten eta han aritu ziren lau jokalariak doneztebarrak izan ziren. Partida honek sekulako ikusmina sortu zuen eta jende anitz hurbildu zen ikustera.
LAXOA TXAPELKETA
Gazteen laxoa txapelketan herriko bi taldek lortu dute finalerdietara pasatzea. Irailaren 6an eta 10ean azken finalerdiak egin ondotik, irailaren 13an finala jokatuko da.