Ezkurrako eta Leitzako mendizaleek elkarrekin mendi irteerak egin dituzte ekaineko azken bi larunbatetan. Ekainaren 21ean egin zuten lehendabiziko mendi buelta, 34 mendizale bildu ziren eta lau ordu eta erdiko bidea egin zuten. Goizeko 08:00etan Perralekutik abiatu ziren, Erakurriko bidetik eta lau ordu eta erdiko ibilbidea egin zuten. Hamarretakoa Ezkainen egin zuten, Olegitik segi eta Iruñarrira igo ziren, han Eratsungo lurretan dagoen menhirra ikusi eta atseden hartzeko aprobetxatu zuten. Duela gutxi berritutako dolmen handi batera joan ziren gero eta Eratsungo baserrietako pistari segiz, Ezkurrako Ola baserrian barna, Ezkurrako plazara iritsi ziren. 13:30ean Barranka ostatuan elkartu ziren eta bertan egon ziren arratsaldeko bostak arte. Migel Elizalderi eskerrak eman nahi dizkiogu bideko oteak, osinak eta sastrakak garbitzen aritu zelako, ibilbidea egiterakoan arazorik ez egoteko.
Ekainaren 28an berriz, 52 mendizalek Ezkurratik Arantzarako bidea egin zuten. Jaiotzez arantzarrak izan, baina Leitzan bizi diren Iparra familiakoek antolatu zuten irteera.
Perralekutik abiatu ziren goizeko 06:30ean eta Ezkainera igota, Olegitik barna joan ziren Iruñarri menhirrean atseden hartzeko. Hiru orduko ibilbidea egin ondotik, Sorgin Zelaira iritsi ziren eta bertan hamarretakoa egin zuten. Loizateko ataka igaro eta Ekaitzara igo ziren gero. Han ezbehar ttiki bat gertatu zen, mendizaleetako batek, Jose Mari Etxeberriak eskuineko oinean min handia sentitu eta oinez segitzeko modurik ez zuelako. Hala ere, presaraino jeisteko modua izan zuen eta bertatik Jose Mari Elizaldek kotxez Doneztebeko osasun etxera eraman zuen. Mendikuak ehun haustura zuela erran eta hamabost eguneko atsedenaldia gomendatu zion.
Mendizaleetako batzuk Mendaurko ermitara igo ziren eta zazpi ordu eta erdiko ibilbidea eginda, denak Arantzako Aterpean elkartu ziren. Bertan bazkaldu eta giro bikaina izan zuten bazkalondoan kantari: Erribera, Txoria txori, Urepeleko Artzaia… Arratsaldeko seietan autobusa hartu eta zortziak aldera iritsi ziren Leitzara.