Ttipi Tttapako azken alean aipatu genuen, 46 bazkide Benidorm aldera joatekoak zirela maiatzaren 19tik 31ra. Azken 20 urte baino gehiagotan, Fenicia hotelean hartu izan dute ostatu baina aurten ez da horretarako aukerarik izan. Poseidon hotelera joatea erabaki dute eta guztiak gustura ibili dira bertan. Instalazioak oso ongi zeudela eta bazkaria ere benetan goxoa zela aipatu digute. Dena den eragozpen ttiki bat ere izan dute: hotelak 14 solairu ditu eta 4 igogailu, horren ondorioz bazkaltzeko eta afaltzeko orduan kolapsatu egiten ziren. Bizkorrenek bazkalordua aurreratu zuten, horrela arazoa ekin zuten.
Eguraldia ere lagun izan zuten, gauetan giroa frexkatuta. Elkartekide batzuk barkuz paseo bat emateko ere probestu zuten egunetako bat eta besteak beste Calpeko falch harkaitza ikusi eta mariskada eder bat jateko aukera izan zuten. Itzulerako bidaia ere aurrekoetan baino erosoagoa izan zela aipatu dute. Geldialdiak moldatu eta ordutegia aldatu dute, hala gehienak etxean zeuden arratsaldeko seiak baino lehen.
ORDEZKARIEN BILERA
Maiatzaren 22an Arkupeak Elkarteko 32 ordezkari bildu ziren Doneztebeko egoitzan.
Pedro Bañares presidentearen agurraren eta aurreko bilerako aktaren irakurketaren ondotik, bilerako gai garrantzitsuez hasi ziren solasten.
2013ko diru balantzea egin zuten eta 492.243,09 euroko diru sarrera eta 490.952,01 euroko gastua egin zenez, 1.291,08 euroko irabaziarekin bukatu zen urtea.
10. boletina ere aurkeztu zen, bazkideen artean banatu aurretik eta Europa eta Argentinara antolatu dituzten bidaiak azpimarratu zituzten. Argentinara joateko asmoa dutenek, 30 euroko aseguru bat har dezakete nahi badute.
Irailetik aurrera ikastaro berriak eskaintzeko asmoa ere badute, baina horien berri aurrerago emanen zaizue.
La Caixako ordezkariak ere bilerara agertu ziren formazio saio batzuen inguruan solasteko: informazio eta komunikaziorako teknologiak, osasuna eta ongizate soziala, boluntariotza, gizarte lana… besteak beste. Hitzaldi batzuk ere eskainiko dituzte “irrifar batekin esnatzearen” inguruan.