Malerrekako Mankomunitatean dauden hamahiru udalerrietako herritarrak Donezteben bilduko dira aurten, hirugarren aldiz eginen den Malerrekako Egunaren baitan. Lehen bi edizioetan Zubietan eta Eratsunen izandako arrakasta errepikatzeko asmoz, egun osoko besta antolatu dute maiatzaren 31rako.
Goizean, 10:00etan, harrera ekitaldia eginen da Bearzana plazan eta herrietako ordezkariek egunari hasiera emanen diote. Doneztebeko Udalak herriko 16 kultur eta kirol elkarteri eskainiko dien omenaldiaren ondotik aurreskua dantzatuko dute eta gosaria eskainiko zaie herrietako ordezkariei. Musika Eskolako musikariak ibiliko dira herrian barna.
Aldi berean, 10:30etik 14:00etara, artisauak eta talogileak izanen dira eliz atarian. 10:30etik 12:30era dantzariak ariko dira Bearzana plazan, Mendi Abesbatzak ere bere emanaldia eskainiko du eta buruhandiak ibiliko dira herrian. 12:30etik 14:00etara betiko ofizioen erakustaldia eginen da Santa Luzia plazan eta 14:00etan paella jatea eginen da eliz atarian, Malerreka Kantuz-en parte hartzen duten abeslariek lagunduta.
Arratsaldean, berriz, 16:00etatik 17:00etara muxikoak izanen dira Santa Luzia plazan Musika Eskolako musikariek lagunduta eta ordu berean hasi eta 18:00 arte Malerrekako Mus Txapelketaren finala ejokatuko da. 17:00etatik 18:00etara berendua (txokolatada) izanen da umeentzat Santa Luzia plazan, buruhandiak kalejiran, Musika Eskolako musikariak herrian barna eta aizkora apustua Bearzanako frontoian. 18:30etik 19:30era laxoa partida jokatuko da Bearzana plazan eta pilotaren inguruko erakusketa Kasino elkartean.
20:00etan zozketa egin eta mus txapelketako sariak banatuko dituzte Santa Luzia plazan eta hurrengo urteko Malerrekako Eguna antolatzeko lekukoa ere orduan pasatuko diote Doneztebeko udal ordezkariek Elgorriagakoei. “Malerreka leihotik begira” lehiaketaren sari banaketa ere eginen da. Argazki eta literatur lehiaketa honetan Malerrekako eskoletako neska-mutikoek hartu dute parte eta arrakasta handia izan du.
21:00etan joaldunak atera eta 21:30ean afaria eskainiko da Santamaria jatetxean. Gauerditik aitzinera musika izanen da Santa Luzia plazan Oharkabe taldearekin.
16 OMENDUAK
Erreka KE, Laxoa Elk., Doneztebe FT, Mendi Abesbatza, Ezpelura, Txistulariak, Biherri, Guraso Elkarteak (Mendaur, Erreka, Askin eta Agorreta), Doneztebarrak, Dantzari Ttikiak, Gazte Burrunba, Arkupeak eta Erraldoi konpartsa
AUTOBUS ZERBITZUA
Herri afarirako txartelak Malerrekako Mankomunitatean eskura daitezke, edo 948 451746ra deituta. Egun guztian autobus zerbitzua antolatu dute Malerrekako herri guztiak Donezteberekin lotuz.