Aurkako erreakzioak karriketan, beharrezko kontsentsurik ez parlamentuan, baina indarrean da LOMCE legea. Datorren ikasturtean paratuko dute martxan Lehen Hezkuntzako 1., 3. eta 5. mailetan eta Lanbide Heziketan. Eskualdeko ikastetxe eta instutuen iritzia bildu du TTIPI-TTAPAk eta «informazio gabezia» salatu dute guztiek.
Zurrumurruak ugari eta azalpen argirik ez. Datorrenaren esperoan dira eskualdeko ikastetxe eta institutuak. Hezkuntzaren Kalitatea Hobetzeko Lege Organikoa du izen ofiziala, gehiengoak aldaketarekin hobekuntza handirik espero ez duen arren. Horregatik izanen da agian ezagunagoa LOMCE edo Wert legea bezala. Izena edo abizena dena delakoa izanda ez da gehiegirik aldatzen egoera: hezkuntza erreforma indarrean dago.
Giro nahasi honetan, Jose Iribas, Nafarroako hezkuntza kontseilariak aurkeztu ditu behin behineko dekretuak eta hezkuntza erreforma «nafar erara» aplikatuko zela aurreratu zuen arren, zirrikitu handirik ez du utzi legeak.
EDUKIEN KONTROLA
Gobernu zentralak finkatuko ditu enbor-ikasgaiak eta gutxienez eskola ordutegiaren %60 baino gehiago eskaini beharko zaie Madrilen adostutako edukiei. Horren ondorioz, ikastetxeen «autonomia gutxituko da» diote eskualdeko ikastetxeetako ordezkariek.
Edukietan aldaketa handia ekarriko du, Nafarroa ez baita erreferente nagusia izanen. Desagertu egin dira Nafarroako kultur adierazpideei lotutako edukiak eta Espainiako gertaera historiko eta pertsonaiak ugaritu. Orain artean, hurbileko adibideak aintzat hartzen ziren eta aurrerantzean badirudi ez dela hala izanen.
Atzerriko bigarren hizkuntza bat eskaintzeko aukera aipatzen du hezkuntza erreformak, baina horretarako heziketa artistikoa, hau da musika edota plastikari eskaintzen zaizkion orduak erabiliko lirateke.
IKASKETA EREDUA
«Atzera pausoa da, adostasunik ez duena eta kalitatezko hezkuntza ereduaren aurka doana».
ZAZPIGARRENA
7
ERREFORMA
egin dituzte hezkuntza arloan Frankismoa amaitu zenetik.
AZTERKETAK
Ikasketa amaierako tituluak lortzeko, azterketa egin beharko dute DBHko 4. mailako eta 2. Batxilergoko ikasleek. Ikastetxeek orain artean zuten ahalmena galduko dute, azterketak eskolaz kanpoko erakunde batek antolatu eta zuzenduko dituelako. Hauek ez dira izanen ikasleek gainditu beharreko langa bakarrak, lehen hezkuntzako 3. eta 6.mailan ere kanpo ebaluazioen bitartez ebaluatuko dituzte ikasleak.
EBALUAZIOEN ONDORIOAK
Ikasketa prozesuan horrek eragina izanen duela uste dute irakasleek «gaitasunak landu ordez, gure eguneroko jardueretan garrantzi gehiago emanen zaio azterketak gainditzeari, azken finean emaitza ikusgarriak lortzeari». Presioa ikasleengan eta baita ikastetxeengan ere, ikasleen emaitzak zerrenda publikoetan kaleratuko dituztelako. Horrek ikastetxeen rankinga sor lezakeela ohartarazi dute. Ondorioz, «ikastetxe batek hagitz proiektu sendo eta interesgarria eduki dezake baina batez ere matematika eta hizkuntzak neurtzen dituen kanpo azterketa horren emaitzak onak ez badira, agian sailkapen horretan beheko aldean agertuko da, horrek ekar liezaiokeen prestigio galerarekin». Emaitza horiek gainera eragin zuzena izan dezakete, matrikulazioetan, baita eskolak jasoko dituen diru-laguntza eta irakasleen lan baldintzetan ere.
IKASLEEN ZATIKETA
Lanbide Heziketan hasteko adina aurreratuko dute. Derrigorrezko Bigarren Hezkuntzan aitzinera egiterik ez duten ikasleek Oinarrizko Lanbide Heziketan eman ahalko dute izena, 15 urterekin. Horrekin, Batxilergoa edo Lanbide Heziketaren artean aukeratzeko unea urtebete aurreratuko da.
HIZKUNTZA GUTXITUAK KALTETUTA
Euskara Heziketa Fisikoa eta Musikaren maila berera pasako da eta espezialitate izendapena jasoko du aurrerantzean. Eskualdeko ikastetxe gehienak D eredukoak izanik, neurri honek ez dietela zuzenean eraginen espero dute, «dena den zer gertatzen den ikusi beharko dugu, euskara bultzatzeko pausorik ere ez» omen dute Hezkuntza Kontseilarigandik espero.
EZEZKO BOROBILA
Eskualdeko ikastetxe eta institutuek ezezko borobila eman diote erreformari «atzera pausoa» delakoan. Ostiral beltzak, elkarretaratzeak, informazio bilerak... antolatu dituzte orain artean eta irailean «egoerari aurre egiteko zerbait» pentsatu beharko dutela erran digute. «Hezkuntza eredu egoki baten alde lanean» segitzea delako euren nahia, politikoen nahien arabera mugitzen diren txotxongiloak izan gabe.
LOMCEren ONDORIO NAGUSIAK:
• Kanpo ebaluazioak ugaritu.
• Ikasle eta ikastetxeen arteko lehiakortasuna bultzatu.
• Ikasle “on” eta “txarren” arteko banaketa.
• Lanbide heziketan hasteko adina aurreratu: 15 urtera.
• Euskara espezialitateko ikasgaia bihurtu.
EDUKIEN ALDAKETAK:
• Edukien gaineko kontrol handiagoa Madrilek.
• Erreferente nagusia Espainia izatea Nafarroa beharrean.
• Atzerriko bigarren hizkuntza bat eskaintzeko aukera. Orduak arlo artistikoari gutxituz.
• Formakuntza akademikoa soilik landu, gaitasun guztiak landu beharrean.
ESKUALDEKO IKASTETXE ETA INSTITUTUEKIN SOLASEAN
Bortzirietako ikast. publikoak+Toki Ona
«Alderdi politiko bakoitzak bere legea egin nahi du. Itun handi bat behar da hezkuntza politikoen menpe ez gelditzeko».
Baztan ikastola
«Hezkuntza zentralizatu nahi dute, gure lurralde eta kulturarekiko duen hurbiltasuna gutxietsiz».
Leitzako Erleta eskola
«Gauzak presaka doaz, informazio falta handia da. Lanean hasi ahala egin beharko diogu aurre datorrenari, ahal dugun eran».
Lekaroz-Elizondo Institutua
«Gaitasunak landu ordez, emaitza ikusgarriak lortzea du xede. Lehiakortasuna bultzatzen du eta ez benetako ikas prozesua».
Urdazubi, Zugarramurdi eta Baztango eskolak
«Urteetan lortutako aurrerapen guztiak, 30 urtez gibeleratuko dira. Ikasle eta ikastetxeen bazterketa, mailakatzea... dakar»
Malerrekako Herrietako Eskolak
«Oztopoak jarriko zaizkie zailtasunak dituztenei. Gizarte konpetitibo bat eraikiko da konpetentea landu ordez».
Doneztebeko Mendaur Institutua
«Ikuspuntu enpresarial eta konpetitiboa asko indartuko da sormena eta iritzi kritikoa bultzatzen duten arloak murriztuz».
Berako Labiaga ikastola
«Lanbro moduko bat dago gaiaren inguruan, ez dago ezer ukigarria. Legea aplikatu nahi dute presaka eta gaizki egin arren».
Lesakako Tantirumairu ikastola
«Ziurgabetasun handia dago. Bertako hezkuntza eredu propioa diseinatu eta garatzea izanen litzateke egokiena».