Ohikoa denez, ikasturtea bukatzen ari denean Nafarroako bertso-eskoletan ari diren gaztetxoek bere eguna ospatu zuten. Larunbatean egin zuten eta aurten Altsasun zuten hitzordua. Eguneko ekitaldien artean, bertsopaper lehiaketako sari banaketa ere egin zuten. Tartean, Bortzirietako hiru bertsolari gaztetxo ere saritu zituzten.
Nafarroa osoan ari diren 50 gaztetxo inguru elkartu ziren larunbatean Altsasuko Iortia Kulturgunean Nafarroako Bertso Eskolen Eguna ospatzeko. Ongi etorriaren ondotik, taula gainetik kantatzeko aukera izan zuten bertsolari gazteek. Saioa bukatuta, aurtengo bertsopaper lehiaketako sari-banaketa egin zuten. Lehen Hezkuntzako 3. eta 4. mailan, Lesakako Orti Arotzena Portu suertatu zen irabazle; LHko 5. eta 6. mailan Berako Ekhiñe Zapiain Arlegi; DBHko 1. eta 2. mailan Lesakako Uxue Mesa Garmendia eta DBHko 3. eta 4. Mailan, Altsasuko Idoia Granizo Uribarren.
Bazkaldu eta gero, jolas didaktikoen txanda ailegatu zen. Nafarroako Bertso Eskolen Eguna ikasleek beraiek prestatutako bertso saioa izan zen, Aimar Karrika eta Xabier Terreros bertsolariekin.