Gure Esku Dago ekimena Malerrekan zabaltzen joateko, maiatzaren 24an (larunbata) Gure Esku dago eguna antolatu dute. Hitzordu honen helburua ekitaldiz betetako egun polita antolatzea da, ekainaren 8an Durango eta Iruñea lotuko dituen giza katerako giroa berotzen joanaz.
Eguna argi soinuekin hasiko da 10:30ean. 11:00etan Bearzana frontoian herri kirolak antolatuko dira, Malerrekako 6 talderen partehartzearekin: Doneztebe, Elgorriaga-Ituren-Zubieta, Basaburua, Oiz-Donamaria-Urroz, Bertizarana eta Sunbilla. Talde bakoitza 8 edo 10 lagunez osatua egonen da eta sei edo zazpi probei aurre egin beharko diete.
Kirolen ondoren, 13:00etan giza kate bat eginen da, ondotik herri bazkaria eta akitzeko mus eta partxis txapelketa, umeendako jolasak eta puzgarriak ere izanen dira. Eguna borobiltzeko erromeria antolatu dute.
Egun honetan metroak eta materiala salgai jarriko dira, Gazte Burrunbak antolatutako egunean (maiatzaren 17an) eta Malerrekako egunean (maiatzaren 31n) bezalaxe. Ostiz liburu-dendan eta Elgorriagako ostatuan ere eskuratzen ahal dira noiznahi. Malerrekako aurreikuspenak aisa bete dira, dagoeneko 120 metro saldu baitira. Ekainaren 8rako 150eko muga gainditzea espero dute. Antolakuntzak autobusak paratuko ditu egun horretarako eta doan izateko boletoak salgai jarriko dira Baztan, Bortziriak eta Malerrekan. Ekainaren 8rako animazioa ere prestatu behar da Baztan eta Bortzirietako jendearekin bat eginda: fanfarrea, joaldunak, musikariak, dantzariak…