Maiatzaren 16tik 18ra ospatuko da Sunbillako Asteburu Kulturala eta urtero bezala, hainbat ekitaldi antolatu dituzte. Akitzeko, igandean, artisau feriaren eta gazta lehiaketaren seigarren edizioa eginen da.
Ortziralean, 16:30ean haur jokoak izanen dira. Ondotik, txokolatada. 19:00etan hitzaldia eta bideo emanaldia izanen da Euskal Herritik barna itzulia egin duen Arkaitz Astiazaranen eskutik. 20:30ean, afari autogestionatua eginen da Ulibeltzak elkartean, edo bertze hitzetan, bakoitzak zerbait eraman beharko du. 22:00etan mus txapelketa jokatuko da Bustitzen.
Larunbat goizeko 9:00etan mendi eta bizikleta ibilaldietarako izen ematea irekiko da Fonda atarian. Ordu erdi beranduago abiatuko dira mendizaleak eta txirrindulazaleak. Oinez, Plaza-Arretxekoboda-Zumaleku (jateko zerbait)-Txurinborda-Plaza ibilaldia eginen dute. Bizikleta buelta, berriz, plazatik abiatuta, Auloa, Bulatxiki, Zumaleku (jateko zerbait) eta Arretxekobordan barna plazan akituko dute. 16:00etan bazkaria izanen da Ariztigain kanpinean. Apuntatu nahi duenak txartelak bertan izanen ditu salgai. Goizez eta arratsaldez Jokulandia izanen da. 17:30ean Malerrekako Eguneko finalerako Sunbillako mus kanporaketa jokatuko da Bustitz ostatuan. Ilunbarrean poteoa eginen da txaranga herrikoiarekin.
Igandean, azkenik, 10:00etatik 13:00etara artisau feriaren eta gazta lehiaketa herrikoiaren seigarren edizioa eginen da. Arratsaldez ere artisau feria izanen da, 4:30etik 7etara. 17:30ean haur dantzariak ariko dira eta 19:00etan gazta lehiaketaren sari banaketa eta saskiaren zozketa eginen dituzte.