Hurbileko norbait hiltzen denean haurrekin heriotzaren gaia lantzea ezinbertzekoa da. Gogorra bada ere, adituen arabera, ez zaie gezurrik erran behar, ezta errealitatea ezkutatu ere. Modu sinplean eta ahalik eta abudoen, gertatutakoa esplikatzea garrantzitsua da.
«Hagitz tristea den zerbait gertatu da. Aita/ama hil egin da. Ez da gehiago gure artean egonen, bizitzeari utzi diolako». Hitz gogorrak baina beharrezkoak. Nahia Psikoterapiako Mirentxu Goienetxe eta Ainhoa Arburua psikologoen arabera, hurbileko norbait hiltzean hori izan daiteke gertatutakoa haurrari azaltzeko bidea. «Ume batekin heriotzaz solastea gogorra eta zaila bada ere, ahalik eta abudoen egitea komeni da. Hasierako dramatismo eta nahaste orduak pasatuta, momentu eta toki egokia bilatu eta gertatutakoa hitz sinple eta zintzoekin esplikatu behar da». Heriotza nola gertatu den kontatzeaz ere aritu zaizkigu: «hitz guttitan egiten ahalegindu behar dugu. Adibidez, ‘azken aldian hagitz gaixorik zegoen eta gaixotasunaren ondorioz hil egin da’». Egoera horretan, «edozein gaixotasun arruntekin hiltzeko beldurra senti dezake haurrak, eta hortaz garrantzitsua da norbait hil denean hagitz gaixorik zegoela erratea, guttik duten gaixotasuna zuela erratea». Heriotza istripu bat tarteko denean, «hagitz larri zauritua gelditu zela konta diezaiokegu, mediku eta erizainek ahal zuten guztia egin zutela gorputza ‘konpontzeko’, baina batzuetan hain zauritua edo gaixorik dagoenean botikek ezin dutela sendatu».
ZERGATIK?
Zergatik hil da? Zergatik niri? Ez dira harritzeko galderak. Arburua eta Goienetxek aholku batzuk eman dituzte erantzunekin laguntzeko: «ez da deus ere pasatzen guk ere gure buruari galdera berak egiten dizkiogula edo erantzuna ez dakigula erranda. Bizidun guztiak egunen batean hilko garela eta mundu guztiari gertatzen zaiola jakinarazi behar zaie. Baliteke haurrek eurek pentsatu, erran edo egindako zerbaitek heriotza eragin duela pentsatzea. Ume batek ‘hobeki portatu izan banintz, ez litzateke hilko’ erraten badu, garbi utzi behar zaio ez dela bere errua izan». Haurrek heriotza zer den ulertzen laguntzeko, egunerokoan heriotza presente dagoen adibideak erabil daitezkeela diote psikologoek: «ingurumenean, animalien heriotza...».
HILDAKOARI AGUR ERRAN
Goienetxek eta Arburuak argi dute: «haurra beilatokira, hiletara... joateko animatu behar da. Gisa honetako ekintzek heriotza zer den ulertzen lagun diezaioke eta doluaren prozesua hobeki hasten lagundu. Hori bai, aukera baldin bada, zer ikusi, zer entzun eta erritu horien zergatia aitzinetik azaltzea ere komeni da».
Haurra hildakoa ikustera eramatearen aldekoak dira bi psikologoak: «ume aunitzek gorputzaren gaineko irudi faltsuak dituzte. Gorputza mugitzetik erabat gelditu dela adierazi behar zaie, eta betiko dela, arnasteari, jateari, solasteari, komunera joateari utzi diola eta ez duela minik sentitzen». Are gehiago, «ez duela deus ere sentitzen esplikatu behar zaie». Horrekin batera, «ez dela amets bat erran behar zaie eta ez dela gehiago esnatuko». Hildakoa ikusi aitzinetik, gorpua non dagoen eta zein itxura duen kontatzea ere ona omen da, baita «haurrak gorpuaren ondoan lasai momentu bat pasatzea» ere. Halere, gorpua ikusi nahi ez badu, «ez derrigortu eta ez gaizki sentiarazi joan nahi ez duelako».
Bizirik gelditu den aita edo ama haurraren beharrei erantzuteko ukituegia badago umearen hurbileko norbait beretaz arduratzearen garrantzia ere azaldu dute, «haurrari emozioak adierazteko aukera eman eta bere galderei erantzuteko eroso sentituko den norbait».
DOLU OSASUNTSUA
Nahia psikoterapiakoen hitzetan dolua lantzeko «lau egiteko» daude:
• Errealitatea onartzea: heriotza gertatu eta atzeraezina dela onartu, eta ‘ez da egia’, ‘ezin dut sinistu’ gainditu behar dira. Horretarako hildakoa ikusi eta hiletara joatea lagungarria izan daiteke.
• Sentimendu eta emozioak landu: emozio edo sentimenduak gordez gero, dolu patologikoaren arriskua haunditzen da. Hortaz, hauek saihestu behar dira: gogorrarena egin, hildakoa idealizatu, bere galeraren alderdi atseginak bakarrik kontuan hartu, mina pilula eta alkoholarekin arindu, hildakoa oroitarazten duten guztia saihestu eta hiperaktibitate eta antsietate handiz okupatuta egon.
• Hildakoa ez dagoen ingurura egokitu: denbora batera hildakoa gabe bizi behar dela onartu behar da, eta hala, lehen hildakoak egiten zituen gauzak norbere gain hartu beharko dira.
• Hildakoari emozionalki lotu eta aitzinera segi: maite duzunaren oroitzapenak ez dira sekula desagertuko. Beraz, helburua ez da hildakoaz ahaztea, bizitza psikikoan tokia bilatzea baizik.
zen beretzat ere, sentimendu berdinak genituela ikusten zuelako». Seme txikiak, aldiz, ez omen zuen negarrarekin adierazi: «ez zuelako ulertzen hil eta berriz ez ikustearen ideia. Baina zerbait arraroa bazegoela sumatzen zuen».
ALETA SEINALEAK
-Bizitzeko gogoa, loa, apetitua galtzea.
-Bakarrik gelditzeko beldurra sentitzea.
-Hildakoa etengabe imitatzea.
-Denbora luzez lagunengandik urruntzea.
-Etxetik urruntzea.
-Denbora luzez negar aunitz egitea.
-Kasketak maiz eta luzeak.
-Apatia eta sentikortasun eza.
-Amesgaiztoak eta lo egiteko arazoak.
-Haur ttikien portaera hartzea denbora luzez: pixa gainean egin, haurtxo bat bezala solastu, jatekoa aunitzetan eskatu...
-Buruko mina edo bertze min fisikoak maiz.
-Eskolako errendimenduan aldaketak edo eskolara ez joan nahi izatea.
IZASKUN ZUBIALDE GRAJIRENA | ISTRIPUZ SENARRA GALDU ZUEN EMAKUMEA ETA BI SEME-ALABEN AMA
«Hurbileko baten heriotza gainditzeko haurrei egia esan behar zaie, asko solastu eta maitasun asko adierazi»
«Lehenengo eguna shock eguna izan zen. Ez nuen sinetsi nahi. Berekin haserre nengoen. Min handiko momentuak ziren, sentimendu nahasien egunak». Horrela oroitzen du Izaskunek Lino senarra galdu zueneko garaia. Kamioiarekin izandako ezbehar baten ondorioz, 2009ko urrian hil zen Lino zubietarra. 4 urteko alaba eta urtebeteko semea aitarik gabe gelditu ziren. «Ezin zela egia izan» pentsatu zuen Izaskunek eta «egun hura oso arraroa izan zela» gogoan du: «besteekiko nolako eragina izanen zuen pentsatzen nuen, umeak, gurasoak, senideak... Ez nuen beraiek gaizki pasatzea nahi. Nire buruaz atzendu nintzen lehen momentu haietan».
Baina garbi izan zuen seme-alabei egia esanen ziela: «alabari arrats hartan egia kontatu nion, nire ustez haurrei momentu guztian egia esan behar zaielako. Babestu nahi ditugu, baina errealitatea onartzea da egokiena. Egia esan, negar egin eta solastu, sentimenduak atera. Semeak, berriz, urtebete besterik ez zuenez, poliki-poliki konturatuz joan zen. Bere garapenaren arabera esplikatu nion. Solasten hasi zenean, galderak egiten hasi zen, eta une hartan egia kontatu nion. Istripua pasatu zenean ere esan nion gehiago ez zela etorriko, istripua izan zuela eta hil egin zela».
Alabak «negar asko» egin zuela oroitzen da Izaskun, eta «andereñoari kontatu behar ziola esan zidan. Elkarrekin negar egitea oso garrantzitsua izan Aitaren hutsunea nabaritu arren, bizitza berregin behar izan dute. Halere, Izaskunek azpimarratu digunez, «aita gure ahoan dago edozein momentutan eta naturaltasun osoz solasten dugu. Biek badakite egia zein den, nola pasatu zen istripua eta ez dugula berriz ikusiko. Gure bihotzetan beti egonen dela ere badakite». Izaskunen irudiko, heriotza gainditzeko «jarrerarik egokiena egia esatea da. Egia esaterakoan konfidantza handia eta elkarrekin askoz komunikazio hobea sortzen da. Esperientzia txarrak gainditzeko konfidantza guztiarekin solastu besterik ez dugu, hau da, barruan ez gorde». Haurrek helduek baino lehenago gainditzen dute dolua eta horren seinale hauxe adierazi digu: «aitaren istriputik sei hilabete pasatu zirenean, alabak gure familia marraztu zuen. Marrazki horretan ama, anaia eta bera ageri ginen. Aitaren hutsunea onartu zuela adierazi zidan marrazkiak».
Gizartean heriotzaren gaia «tabu» bat bailitzan ikusten du Izaskunek, eta bere ustez, «ez luke horrela izan behar. Pertsona guztiak jaio, bizi eta hil egiten gara eta ez dakigu noiz izanen den gure bukaera. Horretarako prestatua egotea oso garrantzitsua da. Etxe eta eskoletan gaia jorratzea ere egokia ikusten du. Berak behintzat garbi du: «haurrei egia esan, asko solastu eta maitasun asko adierazi». Horixe da halako egoera gogorrak gainditzeko bere aholku nagusia.
ADINA ETA ULERMENA
Heriotzaren ulermena adinaren arabera
Adinaren arabera, haurrek ez dute berdin ulertzen heriotza. Nahia psikoterapiako kideen arabera, umeek heriotza «atzeraezina, unibertsala eta iraunkorra dela ulertzeko denbora eta bizi organismoaren funtzionamendua bezalako kontzeptuak ulertu behar dituzte». Hala, kontuan hartu beharreko faktoreak bortz direla diote Mirentxu Goienetxek eta Ainhoa Arburuak: «adina, heldutasuna, ulermen gaitasuna, baloreak eta erlijio sinismenak».
0-10 HILABETE ARTEKOAK
• Ez dakite heriotza zer den, banantze bat bailitzan bizi dute. Galera, batez ere amarena bada, bat-bateko aldaketa eragiten du. Haurtxoak ezinegona senti dezake amaren falta somatuta eta bere inguruan aurpegi eta ahots berriak daudela ohartuta. Atsekabetuak sentitzen dira euren bizitzako pertsonarik garrantzitsuena falta zaienean. Ingurukoen mina barneratzen dute (jolasteko tarterik ez, aurpegi irribarretsurik ez...) eta elikadura ohituretan eta loan aldaketak izan ditzakete, negar etengabea ageriko arrazoirik gabe, umore txarra...
• Hildakoa bertze familiako bat bada, amak sentitzen duen mina sumatuko dute.
• Zer egin? Haurtxoaren errutina mantendu, ohiz kanpoko soinu eta gertaerak bere inguruan murriztu eta ahalik eta azkarren haurtxoaz arduratuko den pertsona bere bizitzan barneratu.
10 HILABETETIK 2 URTERA ARTE
• Ez dute heriotza ulertzen. Banantzea edo uztea dela uste dute.
• Haurtxoaren erantzunak hauek dira: haserrea, negarra, hertzeetako arazoak... Lehengo jarrera har dezakete, behatza txupatuz adibidez. Aldaketak, orokorrean, denboraldi baterako izaten dira, eta familia berrantolatzen denean eta haurtxoaren ingurua egonkortzean desagertzen dira.
• Zer egin? Egonkortasun eta segurtasuna nagusi den ingurua eman, errutina mantendu, ahalik eta denbora gehien eskaini, babesa eta maitasuna eman, lasaitu eta jolastu, gauzak eta sentitzen duen tristuraren arrazoiak azaldu, eta honelako esaldi sinpleak errepikatu: «aita hil egin da». Gisa honetara zerbait garrantzitsua gertatu dela ulertzen lagunduko die eta horren ondorio direla etxean izan diren aldaketak. Beharrezkoa bada laguntza eskatu.
2-5 URTE BITARTEKOAK
• Ez dute ulertzen heriotza atzeraezina, iraunkorra eta behin betikoa dela. Beraientzat heriotzaren kontzeptua mugatua da, hildakoa ez da betirako. Denboraz duten kontzeptua ere mugatua da: maiz galde dezakete noiz itzuliko den ama edo aita. Heriotza pentsamendu edo jarrera txarraren ondorio izan dela ere pentsa dezakete, edo harritu gaitzaketen galderak egin: «zergatik ez dugu bilatzen bertze aita edo ama bat?» Axolagabetasuna ere erakus dezakete, ez dutelako denbora luzez mina agoantatzen. Beren galdera bertzeei kontatzeko beharra ere sentitzen dute, baita ezezagunei ere. Laguntza bilatzeko egin dezakete edo bertzeen erreakzioak zein diren jakin eta nola sentitu behar duten deskubritzeko.
• Ohiko jarrerak: arazo fisiologikoak (loan aldaketa, apetitua, tripako mina, haizeak...), gibelera egitea (behatza txupatu, kasketak...), beldurrak sentitzea (iluntasunari, ohatzera joateko, toki berrira joatean...), erruduna bera dela sentitzea, emozioak (antsietatea, tristura, estutasuna sentitu, negarrak, axolagabetasuna...)...
• Zer egin? modu sinple eta argian eman heriotzaren berri; kontaktu fisikoaren bitartez berekin solastean konfidantza eman; heriotzarekin gorputza erabat gelditzen dela azaldu; ez baztertu solasaldi eta bisitetatik; pazientziarekin jokatu, ez haserretu eta ez erruduna sentiarazi; zuregandik ez urrundu eta ez bertze toki batera bidali; sentimenduak azaleratzeko aukera eman; uzteko beldurrik senti ez dezan lasaituarazi; «aita lotara joan da eta ez da gehiago esnatuko» edo «jainkoak ama maite zuen eta zerura eraman du» bezalako esaldiak baztertu; eta zure emozioak konpartitu.
5-10 URTE BITARTEKOAK
• Errealitatea ulertzen dute eta 10 urte inguru dituztenean ulertzen dute baina bertzeei bakarrik gertatzen ahal zaiela uste dute.
• Haurrak garai honetan bereziki sentikorrak dira. Heriotza hobeki ulertzen dute baina horri aurre egiteko abilidade pertsonal eta sozialak falta zaizkie. «Zer gertatzen da hildakoan?» bezalako galderak egiten dituzte. Batzuetan deus pasatu ez balitz bezala ere jokatzen dute. Ukazioa hagitz ohikoa da. Gutxiespena eta galera onartzea txandakatzen dituzte. Heriotza eragin dutenaren errudun senti daitezke, jarrera edo pentsamendu txar baten ondorio.
• Zer egin? Emozioak eurekin konpartitu eta berekin egoteko denbora hartu; sentimenduak adieraz ditzaten animatu; egokiak ez diren jarrerak zuzendu baina ohi baino maitasun eta arreta gehiagorekin; lasaituarazi adin horretan heriotzari beldurra sentitzea normala delako, mediku eta erizainekin lotzen dute...; heriotzaren arrazoia modu sentikor eta ulergarrian azaldu; «ez egin negarrik haundia zara» edo «ausarta izan behar duzu» bezalako esaldiak saihestu eta ez hasi hildakoa idealizatzen.
10-18 URTE BITARTEKOAK
• Heriotza unibertsala, atzeraezina eta iraunkorra dela badakite; arrazoibidea ere logikoa da baina ezetza hagitz ohikoa da. Nortasun arazoak ere izan ditzakete eta emozioak ezkutatzeko joera dute. Jarreran ere eragina izan dezake: errebeldeago bihurtu, kontsumoak, gatazkak...
• Zer egin? Emozioak eurekin konpartitu; sentimenduak adierazteko bide osasuntsuak proposatu (kirola kasu); euren kezka eta beldurrei kaso egin; pazientzia eduki eta babesa eta segurtasuna eskaini.
Haurrei gezurrik ez erratea eta errealitatea ez ezkutatzea garrantzitsuak dira. ‘Orain indartsua izan behar duzu’, ‘Ez egin negarrik’ edo ‘Orain etxeko gizona zu zara’ bezalako esaldiak saihestu behar dira.