Bisitari kopuruari begiratuz gero, pasa berri den oporraldia bikaina izan dela esan genezake, aurreikuspen guztiak gainditu baitira. Mantxonea nekazal etxea eta Tito eta Barranka ostatuak beteak egon dira Ostegun Santutik astelehenera arte. Gainera, asko izan omen dira ostatu eta nekazal etxea bete ondotik ere logela eske deitzen zutenak. Bisitari gehienak Katalunia eta Holandatik etorri dira eta tartean txinatar batzuk ere izan dira.
Baina guztia ez zen ederra izan. Apirilaren 18an, eguerdi aldera piztutako sute handi batek ilundu zituelako berri onak. Hiru gune desberdinetan hasi zen sua eta denera 49 hektarea erre ziren. Oronoz-Mugairi eta Cordovillako suhiltzaileak bertaratu ziren sutea itzaltzeko asmotan baina zailtasun handiak tarteko, toki batzuetara iristea ezinezkoa baitzen, hamar orduz luzatu ziren sua itzatzeko lanak. Helikopteroak, urezko-motxilak... erabili behar izan zituzten.
Duela bi urte Nafarroako Ingurugiro Saileko kideak eta Oronoz-Mugairiko suhiltzaileak izan ziren herrian larre erreketak nola egin behar diren azaltzen. Aurten, herritar aunitzek egin dituzte larre erreketak orduan entzundako aholkuak segiz eta suhiltzaileen begiradapean. Ez zen inongo arazorik izan orduan. Ez dakigu bakarren batzuk behar ez zen moduan eta tokian sua kontrolik gabe egin eta emaitza sute handia izan ote den. Jakina da ordea, arrisku handia sortu eta suhiltzaileentzako hamar orduko via crucisa eragin zuela suak.