150 lagun elkartu ziren apirilaren 5ean Doneztebeko zine aretoan Gure Esku Dago ekimenaren aurkezpen labur eta polita ikusteko. Ekitaldi xumea baina atsegina burutu zuten: bertako dantzariak, bideo ofiziala, bailaran grabatutako bideo ikusgarria eta anitza, familia argazkia, berendu goxoa… Egun horretan saldu ziren Malerrekako lehendabiziko 50 metroak ere.
Aurkezpena abiapuntu polita izan da ekimen hau bailara osora zabaltzeko. Ekainaren 8an Baztan, Bortziriak eta Malerrekako 400 lagun baino gehiago elkartzeko helburua eta erronka ezarri da. Egokitu zaigun 108. kilometroa (Itzan) bailarako kolorez, solasez, kantez… jantzi nahi da. Horretarako lan batzordeak buru belarri dihardu egun hori behar den bezala antolatzen.