Nahiz eta Aste Santuko oporrak ortzegunean hasi, aurreko asteburutik jada mugimendua sumatzen zen landa etxeetan. Ortzegunetik igandera bitarte, II Pintxo astea ospatu zen Itturburu, Bustitz eta Ariztigain Kanpinaren eskutik. Bina pintxo egin zituzten: Itturburun, barazki risottoa foierekin eta marisko brika txibi saltsarekin, Bustitzen, ogitarteko Iberiko kurruskaria pikillo-aparrarekin eta arraultze gratinatua baratzuri-tostan; eta Ariztigain kanpinean otarrainxka-brotxeta txipiroi saltsarekin eta odolki eta aza pudina. Pintxoa dastatutakoan gustukoena bozkatzeko aukera ematen zuten.
Ortziral Santuko elizkizunaren ondotik prozesioa egin zen, azken urteetan ez bezala eguraldiak lagundu zuelako.
Igande arratsaldean Trébedes taldearen emanaldia izan zen kanpinean eta ondoren haur jokoak eta txokolatada.
Astelehen eguerdian pintxo irabazlea zein zen zenbatu eta herriko produktuez betetako saskiaren zozketa egin zuten. Pintxo irabazlea Itturburuko risottoa izan zen, ondoren Bustitzeko arraultza eta azkenik Kanpineko pudina. Saria, berriz, Rakel Urtxegi herritarrarentzat izan zen. Zorionak ostatuei antolatutako pintxo astearengatik. Iaz baino pintxo gehiago saldu eta herriko giroa bikaina izan da. Ederrak izan dira pintxoak!