Apirilaren 15ean, laugarren urtez, Joku Topaketa ospatu zen herrian. Egun ederra izan zuten Saldias, Labaien, Legasa, Ituren, Narbarte eta Sunbillako ikasle eta irakasleek. Goizeko 9etan frontoian elkartu ziren. Ondoren taldeetan banatu eta hiru ekintza ezberdin burutu zituzten. Herri Kirolak plazan egiteko aukera izan zuten, eguraldi ederrari esker. Ipuin Kontalariaren saioa ingelesez, udaletxeko ganbaran egin zuten eta plastika tailerra frontoian. Bazkaria plazan egin zuten.
Arratsaldean ere primeran pasatzeko aukera izan zuten. Frontoia mahaiz betea zegoen, Lehen Hezkuntzakoentzako neska-mutikoentzako jokuekin. Bi gelatxo ere bazeuden, Haur Hezkuntzako haurrendako jokuekin. Gurasoei ere luzatu zieten haurrekin jostatzeko eta arratsaldeko goxo bat pasatzeko gonbita eta askok hartu zuten parte. Haurrekin jolastu bidenabar, Burlatako Regalos Gil dendako arduradunak ekarritako material interesgarria ezagutzeko aukera izan zuten, bera izan zen arratsaldeko jolasetarako material guztia ekarri zuena. Arratsaldean kalejira egin zuten plazaraino Maddi trikitilaria eta Aitor tronpetalariaren eskutik.
Egun polita pasatu zuten bertaratutakoek. Antolatzaileak zoriondu beharrean gaude, izugarrizko lana egin baitute.