Ate joka dugu Doneztebeko Udaberriko Feria, ortziral honetan, maiatzak 9, izanen baita. Ohiturari jarraituz, 11:00etatik 13:30era bitarte ahari lehiaketa eginen da Merkatuko Plazan. Aurtengoa zortzigarren edizioa izanen da eta beti bezala, Malerrekako latxa arrazako ahariak sarituko dituzte. Artzain bakoitzak nahi adina buru aurkeztu ahal izanen ditu, eta parte hartzeagatik 30 euro emanen zaizie. Sei sari emanen dituzte, hiru mutur gorriendako eta bertze hiru mutur beltzendako. Bi kasuetan saria berdina izanen da: lehenbiziko sarituek 120 euro hartuko dituzte, bigarren sarituek 70 euro eta hirugarrenek 50 euro. Sari banaketa egun eta toki berean eginen da, 13:30ean.
Baina ez da ahari lehiaketa eguneko ekitaldi bakarra izanen. 10:00etatik 14:00etara bitarte eskualdeko artisauek egindako lanen erakusketa eta salmenta izanen da eta denetarik izanen da: artilea, jantzingintza, grabatuak, egurra, taloak, gasnak, argazkiak, zilarra, laxoa, kaikuak, jantziak eta osagarriak eta eskuz egindako bitxigintza.
Doneztebarrak Merkatarien Elkarteko kideak ere kalera atera eta postuak paratuko dituzte 10:00etatik 14:00etara.
Euria eginez gero, artisauak Elizako atean egonen dira eta eta merkatariak euren dendetan.