Labrit Multimediak eta Euskokultur Fundazioak Nafarroako ondaretik bildutako kantuak eta kontuak biltzen dituzten liburua, DVD-a eta diskoa kaleratu berri dute bilduma bakar batean, Xaldun Kortin, jolastu gurekin izenburupean. Lanaren helburua, guraso euskaldun nahiz ez euskaldunek euren haurrekin euskaraz jolastu eta ikasteko aukera eskaintzea da.
Eusko Kultur Fundazioko Maite Lakar eta Bortzirietako Euskara Mankomunitateko Patri Arburuak apirilaren 11n Iruñean egindako aurkezpen ekitaldian azaldu bezala, haurrekin lotutako ahozko ondarearen bilketan sakondu nahi duten guztiei zuzenduta dago liburua. «Abestiak, ipuinak eta bestelakoak berregin ditugu. Asmatu ez, jaso eta grabatu baino ez. Eta gainera, gaztelaniaz eta frantsesez azpitituluak jarri dizkiogu».
Liburuak, etxean euskara erabiltzeko gomendioak ere biltzen ditu. Xaldun Kortin diskoan kantuak eta ipuinak biltzen dira eta, liburuan, euskarazko tradiziotik berreskuraturiko materialaren gaineko azalpenak. Liburua eta diskoarekin batera datorren DVD-an, azkenik, hezitzaile nahiz gurasoek material ugari aurkituko dute: antzezpenak, abestiak, karaokeak...
Proiektuaren osakuntza parte hartzailea izan da. Hala, Nafarroako herri eskolen laguntza jaso zuten Labrit Multimediako kideek. Tartean, Bortzirietako Bertso Eskola, Elizondoko Abesbatza ttikia eta Leitzaldeko Aralar Musika Eskolako ikasleek parte hartu dute CD eta DVDaren grabaketan, Porrotx pailazoarekin batera.
Euskokultur Fundazioak laguntza eman du bai aspalditik egiten ari den ondare ez-materialaren bilketa eskainiz baita proiektua martxan jartzeko beharrezkoak izan diren finantziazioa eta lehen pausoak emanez ere. Fundazio honen parte den Maite Lakarrek eduki guztien azterketa eta sailkapena bideratu du, eta orain gozatu ahalko duzuen hautaketa ere gauzatu du.
Horrez gain, Nafarroako euskara teknikarien sareak irizpide eta aholkuekin lagundu du lan honen osaketan, euskararen familia bidezko transmisioaz urtetan metatu duen jakintza eta bitartekoak proiektuaren eskura jarriz.
Materiala salgai egonen da eskualdeko liburudendetan eta www.xaldunkortin.com webgunearen bitartez ere erosten ahal da. Eskualdeko Euskara zerbitzuek, bere aldetik, aurten jaioko diren haurren familiei oparituko die.
Gurasoentzako Xaldun Kortin ikastaro praktiko eta laburrak (2 ordukoak) eskainiko dira. Lehenbizikoak Lesakan eta Beran eginen dira, maiatzaren 22an eta 27an.